Kina është gati që t’i ofrojë vaksina kundër koronavirusit Shqipërisë.
Pak ditë më parë qeveria shqiptare përmes një vendimi i hapi rrugën negocimit edhe për vaksinën kineze “Sinopharm” dhe atë ruse “Sputnik V”. “Abc news” kontaktoi me Ambasadën në Shqipëri dhe u interesua nëse Kina është e gatshme për të ndihmuar Shqipërinë për të siguruar vaksina kundër COVID-19.
AMBASADA
Përmes një përgjigjeje zyrtare, Ambasada kineze shprehu gatishmërinë duke theksuar se “rruga e komunikimit midis dy palëve për zhvillimin e bashkëpunimit mbi vaksinën është e hapur”, nëse dëshiron pala shqiptare. Por në vijim të deklaratës, Ambasada thekson se hyrja e vaksinës kineze në Shqipëri ka të bëjë me një sërë problemesh teknike, ndërsa shton se në qoftë se pala shqiptare ka interes, mund të kontaktojë direkt me kompanitë përkatëse kineze, që është “Sinopharm”. “Kina mbështet me vendosmëri bashkëpunimin ndërkombëtar mbi vaksinën anti-Covid-19. Kina dhe Shqipëria gëzojnë një miqësi tradicionale, rruga e komunikimit midis dy palëve për zhvillimin e bashkëpunimit mbi vaksinë është e hapur. Hyrja e vaksinës kineze në Shqipëri ka të bëjë me një sërë problemesh teknike. Në qoftë se pala shqiptare ka interes për vaksinën kineze, mund të kontaktojë direkt me kompanitë përkatëse kineze. Ambasada kineze është e gatshme të japë asistencën e nevojshme. Gjithashtu, jemi të kënaqur të shohim që Shqipëria të sigurojë sasi të mjaftueshme të vaksinës nëpërmjet rrugëve të ndryshme, dhe kemi dëshirë për të ofruar mbështetje të nevojshme”, deklaroi Ambasada kineze në Tiranë.
VENDIMI
Pak ditë më parë, qeveria miratoi një vendim të ri, më anë të të cilit i dha “dorë të lirë” ministres së Shëndetësisë dhe të Ministrisë së Rindërtimit për zhvillimin e negociatave me shtetet që prodhojnë vaksina, pa përjashtuar askënd. I vetmi kusht është që vaksinat duhet të jenë të certifikuara nga trupa përkatëse në vendin e prodhimit të tyre, duke lënë të hapur mundësinë që Shqipëria të negociojë direkt edhe me ato shtete, që më parë i kishte përjashtuar si mundësi, Rusinë dhe Kinën. “Akt normativ për dhënien e autorizimit ministrit të Shëndetësisë dhe Mbrojtjes Sociale dhe ministrit të Shtetit për Rindërtimin për zhvillimin e negociatave me prodhuesit, me distributorë të autorizuar, me qeveritë ose institucionet e autorizuara prej tyre, të vendeve që prodhojnë ose distribuojnë vaksina anti-Covid, për të siguruar këto vaksina, të cilat janë të certifikuara nga trupa certifikuese në vendin e prodhimit të tyre”, thuhet në dokumentin e firmosur në mbledhjen e një jave më parë.
VAZHDO TË LEXOSH MË TEPËR PËR TEMËN
“Vaksinat e para të Covax vijnë në shkurt, kemi parapaguar 4 milionë $”
“Nesër nis vaksinimi anti-Covid”
