Ka nisur me një minute heshtje në kujtim të deputetit socialist Bashkim Fino i cili u nda nga jeta një ditë më parë nga COVID, takimi i kryeministrit Edi Rama në qytetin e Lezhës, teksa po prezanton kandidatët për deputetë në këtë qark. Ishte kryebashkiaku i Lezhës, Pjerin Ndreu ai i cili kërkoi që të mbahej një minutë heshtje në nder të politikanit socialist Bashkim Fino.
Nga ana tjetër Ndreu, u kërkoi ndjesë simpatizantëve të PS-së të cilët nuk mund të ishin të pranishëm për shkak të masave të rrepta anti-COVID. Ndreu tha se ato janë Partia Socialiste dhe nuk mund të bëjnë demonstrime të shëmtuara rrugëve duke rrezikuar jetën e qytetarëve, pasi ato janë partia që nuk infektojnë, por heqin infektimin nga shoqëria.
‘Qytetarë të Lezhës dhe të gjitha zonave përreth që sot nuk kishim mundësi që ti ftonim në këtë shesh për shkak të pandemisë, ne mund ta bënim edhe sheshin plot, por kjo nuk mund të behej pasi aty po vaksinohen mosha të vjetra nga kjo sëmundje e shekullit. Nuk mund të bëjmë demonstrime të shëmtuara rrugëve të shëmtuara të Lezhës dhe as në sheshin e Lezhës, pasi ne jemi Partia Socialiste. Ne nuk jemi një forcë politike që infektojmë, por e heqim infektimin nga shoqëria.’- tha Ndreu.
