Ministrja e Infrastrukturës, Belinda Balluku tregon përse avioni që zbriti sot në Aeroportin Ndërkombëtar të Kukësit zbriti fillimisht në Rinas.
Sipas Ballukut, ndërtimi i këtij aeroporti në fillim dukej projekt i vështirë. “Në vitin 2018, Rama më tha që do të bëhet një aeroport, i thashë që do të jetë shumë i vështirë. Më tha nisni punën se do ta bëni. Dhe ja ku është. Nuk ka asnjë shans të ndërtohet një aeroport më shpejt se kaq. Është bërë nga puna e grave dhe burrave të Kukësit. Ju nuk keni asnjë dyshim që avioni i parë u ul, Rama di t’i bëjë punët, mban fjalën”.
Balluku sqaron se në 17 qershor do të përfundojnë procedurat për aprovimin e fluturimeve ndërkombëtare.
“Dua të sqaroj, sigurisht në aviacion ka rregulla, të cilat ne i respektojmë. Nga sot do të nisin të gjitha testet nga kompanitë ajrore, për të provuar pistën, procedurat dhe çfarë është më e rëndësishme, për ta bërë këtë aeroport më tërheqës. Në 17 qershor do të jetë totalisht i përdorshëm nga të gjitha kompanitë. Nga ky moment i lihet në dorë koncensionarit. Një aeroport lëviz ekonominë. Pasagjerët vijnë në vend dhe gjenerojnë të ardhura. Ky aeroport do të sjellë zhvillim në ekonomi”.
VAZHDO TË LEXOSH MË TEPËR PËR TEMËN
