Në një intervistë për Report Tv, zëvendësministrja e Shëndetësisë, Mira Rakacolli thotë se në gjysmën e parë të muajit maj do të arrihet objektivi për vaksinimin e gjysmë milionë qytetarë kundër COVID-19.
“Fushata e vaksinimit është një nga fushatat më mirë të organizuar dhe ka vazhduar në normalitet pavarësisht situatës zgjedhore. Mund ta themi me krenari që tashmë në Shqipëri numërohen mbi 450 mijë qytetarë të vaksinuar. Jemi ndër vendet e para në rajonin. Kur sot jemi pak më shumë se 450 mijë dhe sasinë e vaksinave e kemi në dispozicion, objektivin e vendosur do ta arrijmë që në gjysmën e parë të majit”, tha Rakacolli.
Në intervistën e dhënë për gazetaren e Report Tv, Doris Sallaku, Rakacolli garanton se deri më tani nuk ka pasur asnjë efekt anësor nga vaksinat e kryera. Pavarësisht ritmeve të shpejta të vaksinimit, zv. ministrja thotë se ende nuk është arritur imuniteti i tufës.
“Që të arrihet imuniteti i tufës duket ta ketë kaluar mbi 70% e popullatës ose të jetë vaksinuar. Ekspertët nuk mendojnë se kjo është arritur. Vetë fakti që ne vijojmë të kemi raste të rënda apo edhe shpërndarje në bashki që nuk ka qenë më përpara tregon për përhapje të infeksionit”, ka thënë ndër të tjera për Report Tv zëvendësministrja e Shëndetësisë, Mira Rakacolli.
