Robert Lewandowski ishte vendimtar për Bayern Munchen edhe këtë sezon, pavarësisht se fati i keq e la jashtë ndeshjeve çerekfinale ndaj PSG. Polaku do të vijojë të qëndrojë në Mynih.
Karl-Heinze Rummenigge, administrator i deleguar i Bayernit të Mynihut, në një prononcim të fundit për mediet në Gjermani ka siguruar tifozët e kampionëve të Bundesligës se Robert Lewandowski nuk ka shanse të largohet.
Drejtuesi i lartë i bavarezëve reagoi pas thashethemeve që kanë qarkulluar prej disa javësh për një lamtumirë të mundshme të sulmuesit polak: “Unë nuk kam asnjë dyshim se ai do të qëndrojë”.
Lewandowskit, i cili ka shënuar 292 gola në 327 ndeshje që kur u transferua në Bavari në vitin 2014, i përfundon kontrata në vitin 2023. Rummenigge në mikrofonat e “Sport1” theksoi se ai mbetet shumë i rëndësishëm për lojën e Bayernit:
“Kush do ta privonte veten nga një futbollist me 60 gola në vit? Pastaj, menaxherët e tij nuk na kanë thënë asgjë për largimin e tij të mundshëm”.
Prania e Lewandowskit në organikën e kampionëve të Bundesligës shihet madje si pengesë për blerjen e Erling Haalandit. Pak ditë më parë, Oliver Kahn, ish-portieri legjendar gjerman, që do të marrë rolin e Rummenigges më 1 janar 2022, theksoi se Bayerni nuk shpenzon shuma marramendëse për një lojtar si Haaland, sado i mirë të jetë, kur ka Lewandowskin.
Kur mbeten edhe dy ndeshje nga fundi i Bundesliga-s, Lewa ka realizuar 39 gola në 28 ndeshje që është aktivizuar. Një makineri golash. Ai është vetëm 1 gola larg rekordit të Gerd Muller, që në sezonin 1971-1972 realizoi 40 gola. Sulmuesi polak madje mund ta parakalojë, mjafton nga një gol për ndeshje.
VAZHDO TË LEXOSH MË TEPËR PËR TEMËN
20 ditë për të vendosur, ku do të luajë Buffon?
