Një përzierje midis filmit “Truman Show” dhe kopshtit zoologjik, kështu e përshkroi Princi Harry jetën mbretërore në një intervistë me Dax Shepard për podcast-in e tij “The Armchair Expert”.
Duka i Sussex zbuloi se ai dëshironte të largohej nga familja mbretërore që kur ishte 20 vjeç dhe shpjegoi se, përfundimisht, e mori atë vendim për të thyer ciklin e “dhimbjeve ose vuajtjeve” që kishte provuar gjatë rritjes.
Ndër arsyet e ndarjes së tij me Windsor-ët, Harry gjithashtu përmendi vdekjen e nënës së tij, Lady Diana.
“Isha 20 vjeç dhe mendova: Unë nuk e dua këtë punë, nuk dua ta bëj. Shikoni çfarë ndodhi me nënën time? Si mund të ndërtoj ndonjëherë një familje, të kem një grua, kur e di se mund të të ndodhë sërish?”, tha ai.
Sa i përket babait të tij, Charles, princi beson se ai në një farë mënyre ka vuajtur ose trashëguar vuajtjet e prindit të tij.
“Unë nuk mendoj se duhet të drejtojmë gishtin ose të fajësojmë dikë, por unë me siguri kam përjetuar një formë të dhimbjes ose vuajtjes për shkak të dhimbjes ose vuajtjes që babai im ose prindërit e mi mund të kenë pësuar. Kështu që dua të sigurohem që ta thyej këtë cikël”.
