Komitetet e drejtuara nga demokratët në Senatin amerikan dhe Dhomën e Përfaqësuesve do të bëjnë presion mbi administratën e Presidentit Joe Biden për atë që shkoi keq pasi talebanët erdhën në pushtet në Afganistan.
Senatori Bob Menendez, kryetar i Komitetit të Senatit për Marrëdhëniet me Jashtë, tha se ligjvënësit do të hetojnë atë që ai e përshkroi si “ekzekutim i gabuar i administratës Biden për tërheqjen nga SHBA”.
Ai vuri në dukje se Kongresit i ishte thënë në mënyrë të përsëritur se forcat afgane ishin në lartësinë e detyrës për të siguruar vendin, dhe tha se “popullit amerikan dhe afgan nuk i është thënë e vërteta” dhe meritojnë përgjigje.
Kongresmeni Gregory Meeks, kryetar i Komitetit të Punëve të Jashtme të Dhomës, tha se ai ka ftuar Sekretarin e Shtetit Antony Blinken dhe Sekretarin e Mbrojtjes Lloyd Austin të dëshmojnë. Një seancë dëgjimore mund të mbahet javën e ardhshme.
Senatori Mark Ëarner, kryetar i Komitetit të Inteligjencës në Senat, tha gjithashtu se do të punonte me komitete të tjera për të bërë pyetje të vështira rreth “pse ne nuk ishim të përgatitur më mirë për një skenar të rastit më të keq”.
“Ne ua kemi borxh përgjigjet popullit amerikan dhe të gjithë atyre që shërbyen dhe sakrifikuan aq shumë,” tha ai.
VAZHDO TË LEXOSH MË TEPËR PËR TEMËN
