Është një listë e kufizuar degësh, që zor se mbeten me kuota të paplotësuara në raundin e dytë. Bëhet fjalë për profilet kryesore në Universitetin e Mjekësisë, atë të Ekonomikut dhe Informatika me nënllojet e saj.
Ndaj, maturantë, mendohuni mirë përpara se të refuzoni një degë që ngjyroset me të gjelbër, pasi pikët mund të mos mjaftojnë më në raundin e dytë!
DEGËT E PREFERUARA
“Bluza e bardhë” është ëndrra e të paktën 20 për qind të maturantëve në të gjithë vendin, të cilët kanë përzgjedhur në formularin A2 profilet si “Mjekësi e përgjithshme”, “Farmaci” apo “Stomatologji”. Të dytët në renditjen e degëve më të kërkuara nga të rinjtë janë degët e Ekonomikut, në Tiranë e rrethe.
Pas grupit të Shkencave Mjekësore, 14 për qind e aplikimeve adresohen në fakultetet e Ekonomisë. Në toplistën e preferuar vijon të mbetet Teknologjia.
Më saktë Informatika, e cila rezulton të jetë kërkuar nga 12% e maturantëve në Formularin A2. Të dhënat zyrtare nga Rrjeti Akademik Shqiptar që ndërmjetëson procesin e regjistrimit në universitete flasin për një trend pozitiv të degëve profesionale, të cilat kanë njohur një trefishim përgjatë viteve të fundit.
Ndërsa vlen të theksohet se rritja e notës mesatare nuk i ka mbajtur larg të rinjtë nga degët e mësuesisë, veçanërisht vajzat. Sipas informacioneve nga RASH, 8% e tyre kanë zgjedhur një nga këto profile, kryesisht në Universitetin e Tiranës.
DEGËT NË RREZIK
Problematika më e madhe, në fakt, është vërejtur në rrethe. Për shkak se nuk aspirohen nga të rinjtë si dhe filtri i vendosur nga qeveria, shumë prej tyre rrezikojnë seriozisht mbylljen. U bë i disati vit që disa degë në Universitetin e Elbasanit, Gjirokastrës a Vlorës, në rastin më të mirë mbahen hapur me sforco.
Në skenarin e keq, detyrimisht mbyllen, pasi kërkesa as i afrohet numrit dhjetë studentë, sa ç’është kufiri për të mbajtur hapur një klasë. Një tjetër fakultet që njeh tkurrje nga viti në vit, është ai i Shkencave të Natyrës në kryeqytet.
“Ka degë që nuk ka kërkesë të madhe, siç janë disa në Shkencat e Natyrës. Tregu shqiptar i punës nuk është aq fleksibël, sepse të studiosh fizikë diku jashtë do të ishte një nga degët më të preferuara, edhe për kompanitë”, thotë Arjan Xhelaj, drejtor i Rrjetit Akademik Shqiptar. Sipas tij, fokusi i të rinjve, edhe këtë vit është drejt degëve që premtojnë punësim të shpejtë, menjëherë pas përfundimit të studimeve.
VAZHDO TË LEXOSH MË TEPËR PËR TEMËN
