Zëvendëskryeministrja e Republikës së Shqipërisë, Senida Mesi zhvilloi sot takim me akademikë të fushave të ndryshme, në një bashkëbisedim të hapur me temë: “Tërheqja e më të mirëve në administratën publike”.
Duke nënvizuar reformën në administratën publike si një nga prioritetet kyçe të Shqipërisë në rrugëtimin evropian, dialogimi dhe bashkëbisedimi me përfaqësuesit e botës akademike në lidhje me këtë reformë, është sipas Mesi gjithmonë i mirëpritur dhe vlerë e shtuar për ta çuar gjithnjë e më përpara këtë proces të rëndësishëm, i cili ngelet një angazhim madhor i ndërmarrë nga qeveria shqiptare ndaj qytetarëve. “Natyrisht që procesi është kompleks dhe shumë sfidues. Ndaj, gjithë-përfshirja e aktorëve është për mua me rëndësi për të thelluar këtë reformë që kemi nisur”, shtoi ajo.
Gjatë takimit, zv.kryeministrja Senida Mesi njohu të pranishmit me disa nga arritjet konkrete të reformës dhe drejtimet kryesore ku është përqendruar puna për të rritur cilësinë e shërbimit ndaj qytetarëve, ndërsa u shpreh se reformimi i administratës ka nevojë për bashkëpunimin me universitetin dhe fushën akademike.
