Lëvizja Vetëvendosje ka fituar në tri nga katër komunat më të mëdha që kanë hyrë në balotazh të dielën, sipas projeksionit të KOHËS. Ky projeksion e ka nxjerrë fituese partinë e Albin Kurtit në Prishtinë, Prizren e Gjilan.
Humbjen e vetme në komunat e mëdha në këtë rund, Vetëvendosje e pati në Gjakovë ku fitoi sërish Ardian Gjini.
Megjithatë, në tri komunat ku ka fituar Vetëvendosje, rezultati është brenda marxhit të gabimit prej 3 pikë të përqindjes.
Në raundin e parë, kjo parti s’fitoi mbi 50 për qind në asnjë komunë të vendit.
Vitia fiton ngushtë në Prishtinë
Rezultat tejet i ngushtë pritet të dalë nga balotazhi në Prishtinë. Arben Vitia i Lëvizjes Vetëvendosje, sipas projeksionit të KOHËS, do të jetë kryetar i ri i Prishtinës. Në rundin e dytë të zgjedhjeve, ai ka marrë 52.4 për qind të votave. Rivali i tij, Përparim Rama, i Lidhjes Demokratike të Kosovës, ka marrë 47.6 për qind të votave.
Margjina e gabimit në këtë projeksion është 3 pikë të përqindjes, dhe rezultati aktual është brenda margjinës. Për këtë projeksion janë bërë 1065 anketa.
Sa i përket ndarjes gjinore të votuesve, te meshkujt Rama mori 51.7 për qind, kundrejt Vitisë me 48.3 për qind. Ndërsa te gratë, Vitia mori 57.2 për qind, e Rama 42.8.
Në shumicën e grupmoshave Vitia doli më i votuari. Dallim përbënte vetëm grupmosha 56-64 që ia dha shumicën e votave Ramës.
Vitia mori 54.2 për qind të votave në zonën urbane, ndërsa Rama 54.1 në atë rurale.
Haskuka mbetet kryetar i Prizrenit
Mytaher Haskuka i Lëvizjes Vetëvendosje do të jetë kryetar i Komunës së Prizrenit edhe për një mandat, sipas projeksionit të KOHËS për balotazhin e së dielës. Haskuka ka fituar shumë ngushtë përballë Shaqir Totajt të Partisë Demokratike të Kosovës.
Rezultati është brenda margjinës së gabimit, prej 3 pikë të përqindjes.
Në balotazh, Haskuka ka marrë 51 për qind të votave, kundrejt 49 për qind që i ka marrë Totaj.
Në ndarjen gjinore në këtë komunë, Haskuka ka fituar shumicën te gratë ndërsa Totaj te meshkujt.
Haskuka ka fituar në zonën urbane, ndërsa Totaj në atë rurale.
Hyseni rrëzon Hazirin nga pushteti në Gjilan
Lutfi Haziri nuk do të jetë më kryetar i Komunës së Gjilanit, sipas projeksionit të KOHËS për balotazhin në këtë komunë, të mbajtur të dielën. Atë e ka rrëzuar nga pushteti Alban Hyseni i Lëvizjes Vetëvendosje.
Rezultati tejet i ngushtë në këtë komunë është brenda margjinës së gabimit prej 3 pikë të përqindjes.
Hyseni ka marrë 50.9 për qind të votave, ndërsa Haziri bie nga pushteti me 49.1 për qind të votave.
Votat në baza gjinore ishin tejet të përafërta, ndërsa dallimin duket se e ka bërë grupmosha prej 18 deri 25 vjeç. Në këtë grupmoshë Hyseni fitoi 61.2 për qind të votave, ndërsa në të gjitha grupmoshat tjera rezultatet ishin tejet më të ngushta.
AAK-ja mban Gjakovën
Aleanca për Ardhmërinë e Kosovës ka fituar edhe një mandat në Komunën e Gjakovës, sipas projeksionit të KOHËS. Ardian Gjini do të jetë kryetar edhe për katër vjet pasi ka marrë shumicën në rundin e balotazhit ndaj rivales Mimoza Kusari-Lila së Lëvizjes Vetëvendosjes. Gjini ka fituar 55.2 për qind të votave, ndërsa Kusari-Lila 44.8 për qind të votave.
Në ndarje gjinore, Gjini ka marrë shumicën prej 60.6 për qind të votave te burrat, ndërsa kundërkandidatja e tij pati shumicën e lehtë prej 51.8 për qind të votave te gratë.
Gjini po ashtu fitoi shumicën e votave te moshat më të reja, ndërsa Kusari-Lila mori më shumë vota vetëm në grupmoshën 56-64 vjeç.
Kusari-Lila ka marrë 60.1 për qind të votave në zonën urbane, ndërsa Gjini ka marrë 71.8 për qind në zonën rurale.
