Në Shqipëri, situata e pandemisë Covid 19 shënoi një tjetër përkeqësim gjatë javës së fundit (18-24 janar) , me një shtim të vdekjeve dhe të rasteve të reja, ndërsa pozitiviteti kaloi nivelin e 30 përqindëshit. Të dhënat zyrtare të përpunuara nga Zëri i Amerikës, dëshmojnë së në 7 ditët e fundit pati 41 viktima, 11 më shumë se java pararendëse, ose +36 përqind. Këto shifra nuk ishin rregjistruar që prej fundit të muajit nëntor. E diela ishte dita më numrin më të lartë, 8 vdekje, ndërsa në 24 orët e fundit, sipas ministrisë së Shëndetësisë, pati 7 humbje jete të tjera: një qytetar nga Ballshi 59 vjeç, katër qytetarë nga Tirana 62-84 vjeç, një qytetar nga Durrësi 75 vjeç, një qytetar nga Elbasani 76 vjeç, një qytetar nga Lushnja 80 vjeç.
Edhe rastet e reja, u rritën edhe më shumë, duke vijuar tendencën e vënë re që prej dirëve të para të janarit. Në total, gjatë javës së fundit, janë identifikuar 15205 të infektuar, më një shtim prej 15.4 përqind, ose një mesatare ditore prej 2172 të prekurish. 18 janari shënon kulmin e rasteve ditore me 2832 të infektuar. Shifra më e lartë që nga nisja e pandemisë në mars të vitit 2020.
Rritja e rasteve të reja është rregjistruar ndërsa testimet u shtuan lehtë me gati 7 përqind, duke dëshmuar një përhapje ende në rritje të pandemisë. Dhe në fakt, pozitiviteti (raporti mes rasteve të reja dhe tamponëve të kryer) sërish u ngjit më tej, duke prekur kuotën e 30.7 përqindëshit. Një nivel që nuk ishte parë që prej periudhës 8-14 dhjetor 2020. Pozitiviteti është treguesi i transmetueshmërisë së virusit në komunitet.
Rastet aktive u rritën sërish në javën e fundit, duke i ngjitur në më shumë se 23 mijë të prekur, ndonëse mbi 13 mijë të tjerë u deklaruan se nuk ishin më pozitivë. Që prej muajit të shkuar kur u zbuluan rastet e para me Omicron, ky variant mendohet të jetë bërë dominues.
E vetmja e dhënë pozitive në këtë situatë duket të jetë gjendja në spitale. Pavarësisht se në fundjavë të shtruarit kërcyen duke kapur të dielën shifrat e 157 pacientëve, të hënën ato ranë sërish në 129 të shtruar, nga të cilët 13 janë në gjendje të rëndë duke marrë trajtim intensiv./VOA
