Policia e Fierit thotë se Petrit Mamaj ka vrarë bashkëshorten e tij Valdeten mëngjesin e kësaj të marte në banesën e tyre pas një sherri banal për motive të dobëta.
Sipas bluve, në banesën e çiftit këtë mëngjes ka ndodhur një sherr dhe 56-vjeçari, në gjaknxehtësi e sipër ka rrëmbyer thikën e bukës dhe e ka qëlluar në gjoks bashkëshorten, duke e lënë të vdekur në vend.
Por autori ka gënjyer vëllanë dhe uniformat blu.
Sipas burimeve, Petrit Mamaj kreu vrasjen dhe më pas lajmëroi të vëllain polic se bashkëshortja e tij Valdetja ishte vetëvrarë, por ishte ekspertiza ajo që konfirmoi vrasjen.
Blutë thanë se nga provat e grumbulluara, deklarimet e marra, këqyrjes së trupit të viktimës nga eksperti mjeko-ligjor dhe veprimet e mëtejshme hetimore të kryera nga grupi hetimor në bashkëpunim me Prokurorisë Fier, “rezulton se shtetasi Petrit Mamaj, bashkëshorti i viktimës, për motive të dobëta ka goditur me thikë shtetasen Valdete Mamaj, e cila për pasojë ka gjetur vdekjen.
Në bazë të hetimeve të thelluara, i vendosur përballë provave të administruara, shtetasi Petrit Mamaj, ka pranuar autorësinë dhe motivin e ngjarjes”.
Sipas burimeve të Panorama, Petrit Mamaj ishte xheloz dhe debatet në çift ishin të shpeshta per kete arsye.
Njoftimi nga Policia Fier
Zbardhet dhe dokumentohet ngjarja e ndodhur mëngjesin e sotëm në lagjen “Sheq i Madh” Fier.
Pas një pune hetimore në bashkëpunim me Prokurorinë Fier, Policia arreston shtetasin P. M.,si autor i dyshuar i vrasjes së bashkëshortes së tij.
Pas njoftimit të marrë në sallën operative se në lagjen “Sheq i Madh”, Fier, në banesën e saj një shtetase është vetëvrarë, menjëherë është ngritur grupi hetimor dhe në bashkëpunim me Prokurorinë Fier kanë vijuar punën për zbardhjen e plotë të rrethanave të ngjarjes.
Nga provat e grumbulluara, deklarimet e marra, këqyrjes së trupit të viktimës nga eksperti mjeko-ligjor dhe veprimet e mëtejshme hetimore të kryera nga grupi hetimor në bashkëpunim me Prokurorisë Fier, rezulton se shtetasi P. M., bashkëshorti i viktimës, për motive të dobëta ka goditur me thikë shtetasen V. M., e cila për pasojë ka gjetur vdekjen.
Në bazë të hetimeve të thelluara, i vendosur përballë provave të administruara, shtetasi P. M., ka pranuar autorësinë dhe motivin e ngjarjes.
Në vijim të veprimeve, specialistët për Hetimin e Krimeve në Komisariatin e Policisë Fier arrestuan në flagrancë për veprën penale “Vrasja në rrethana të tjera cilësuese”, shtetasin P. M., 56 vjeç.
U sekuestrua në cilësinë e provës materiale mjeti prerës(thikë), me të cilën dyshohet se autori ka kryer vrasjen.
Materialet do i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale.
VAZHDO TË LEXOSH MË TEPËR PËR TEMËN
