Komisioni i Pavarur i Kualifikimit shpalli të enjten vendimin e shkarkimit nga detyra të prokurorit të Fierit, Erind Reovica.
Gjatë seancës dëgjimore të martën më 8 shkurt, Komisioni evidentoi probleme në të tri kriteret e rivlerësimit, atë të profesionalizmit, pastërtisë së figurës dhe pasurisë, ku në këtë të fundit rezultonte me balancë negative në shumën 5 milionë lekë.
Prokurori Reovica nuk ishte i pranishëm në të dy seancat, si në atë dëgjimore ashtu dhe gjatë shpalljes së vendimit.
Ai u përfaqësua nga avokatja Antoneta Sevdari e cila pas relatimit të gjetjeve gjatë seancës dëgjimore kërkoi që të konsideroheshin argumentet e prokurorit – kryesisht lidhur me të ardhurat e deklaruara se ishin përfituar nga puna në emigracion, si dhe kërkoi konfirmimin e subjektit në detyrë.
Procesi i rivlerësimit ndaj prokurorit Erind Reovica u krye nga trupa e KPK-së e kryesuar nga Brunilda Bekteshi, me relatore Firdes Shulin dhe anëtare Suela Zhegun.
Reovica ka filluar punë si oficer i Policisë Gjyqësore në vitin 2006 dhe në vitin 2014 u emërua prokuror në rrethin e Fierit./BIRN
VAZHDO TË LEXOSH MË TEPËR PËR TEMËN
“Anulova lirimin e Astrit Avdylaj”, flet ish-kreu i Apelit Shkodër
Aplikimet për ILD, kandidatët nuk tregojnë interes
Arta Marku miraton 2 kandidatë për KLP
