Tottenham ka marrë fitoren më të thellë sezonale, duke fituar në shtëpi 5-0 ndaj Everton. Një sukses që u jep shpresë Spurs për një vend në Champions League, duke qenë se kanë 2 ndeshje më pak se rivalët.
Të besuarit e trajnerit Antonio Conte ishin dominantw ndaj atyre të Frank Lampard, ndërsa ndeshja u vendos në “shinat e duhura” prej minutës së 14-të kur Kean dërgoi topin gabimisht në rrjetën e tij pas një harkimi të Son.
Vetëm tri minuta më pas, koreano-jugori gjeti vetë rrugën e rrjetës teksa shfrytëzoi më së miri asistin e Kulusevskit. Në vazhdim, euforia e vendasve mbeti në dozat më të larta dhe në këtë formë nuk vonoi goli i tretë këtë herë me Harry Kane.
Sa i takon fraksionit të dytë të lojës, vendasit e nisën aty ku mbyllën pjesën e parë pasi ende pa u mbushur një minutë, Sessegnon shënoi golin e katërt pas asistit të Dejan Kulusevskit.
Në vazhdim, mirëpo Spurs nuk u ndalën dhe Kane realizoi fluturimthi pas një pasimi të Emil Hojbjerg. Në minutat pasardhëse, Tottenham menaxhoi në perfeksion avantazhin duke marrë tre pikë të rëndësishme.