Qeveria e Kosovës pas dështimit për anëtarësim në INTERPOL ka dalë me një deklaratë për media ku shpreh zhgënjimin e thellë që Kosovës i është pamundësuar të jetë pjesë e familjes botërore të policisë.
Në këtë deklaratë thuhet se fushata e egër e Serbisë dëshmoi edhe njëherë karakterin e saj kundër Kosovës dhe kundër idesë për normalizim të raporteve me Kosovën, aq më parë, kur ky anëtarësim ishte teknik dhe jo politik.
Deklarata e plotë e Qeverisë së Kosovës
Sot, Asambleja e Përgjithshme e INTERPOL-it, në sesionin e saj të 87-të votoi kundër anëtarësimit të Policisë së Kosovës në këtë organizatë.
Qeveria e Republikës së Kosovës shpreh zhgënjimin e saj të thellë që Kosovës i është pamundësuar të jetë pjesë e familjes botërore të policisë, që lufton krimin transnacional.
Fushata e egër e Republikës së Serbisë dëshmoi edhe njëherë karakterin e saj kundër Kosovës dhe kundër idesë për normalizim të raporteve me Republikën e Kosovës, aq më parë, kur ky anëtarësim ishte teknik dhe jo politik.
Votimi kundër pranimit të Kosovës në këtë organizatë ndërkombëtare i bën shërbim vetëm krimit dhe kriminelëve dhe askush nuk do të duhej t’i gëzohej këtij fakti.
Qeveria e Republikës së Kosovës, falënderon të gjitha shtetet që votuan për, si dhe të gjithë ata që u përpoqën ta ndihmojnë Kosovën në këtë proces të rëndësishëm.
Kosova do të vazhdojë konsolidimin e institucioneve të saj dhe në një të ardhme shumë të afërt do të jetë edhe anëtare e plotë e INTERPOL-it. /Konica.al/
VAZHDO TË LEXOSH MË TEPËR PËR TEMËN
Kosova nuk pranohet në INTERPOL
Kosova dështon në raundin e parë të pranohet në INTERPOL
