Vllaznia ka treguar veten pikërisht atëherë kur duhej, në sfidën direkte me Kukësin për vendin e tretë. Shkodranët fituan 2-1 në limitin e ndeshjes dhe tashmë e shohin veten të tretët.
Sa i takon kronikës së sfidës, shkodranët u shfaqën më kërkues në pjesën e parë dhe patën shansin për të shënuar me anë të Hoxhajt në minutën e 10, ndërsa më pas provoi edhe Aralica.
Por, Kukësi “kërcënoi” seriozisht në minutën e 31-të kur pas një kundërsulmi të shpejtë Basa harkon në zonë me topin që devijohet dhe përfundon në shtyllë. Vllaznia dhe portieri Zogovic ishin me fat, megjithatë vendasit nuk u tronditën nga rasti i verilindorëve dhe në të 43-tën gjetën golin me anë të Da Silvës i cili shënoi një gol të bukur me kokë ndërsa shfrytëzoi në maksimum harkimin e kapitenit Gurishta.
Në fraksionin e dytë, Vllaznia pati mundësinë e artë me Aralicën në minutën e 76-të teksa kroati nga fare pranë portës së Xhikës nuk u koordinua saktësisht me kokë. Dhe, ligji i pashkruar i futbollit u aplikua që nëse nuk shënon atëherë ndëshkohesh u aplikua më së miri edhe në Loro Boriçi.
Në minutën e 80-të, Shqiprim Taipi ekzekuton një goditje dënimi teksa portieri Zogovic nuk e kontrollon dhe aty përfiton Bruno Lulaj që ndëshkon shkodranët.
Në vazhdim, Vllaznia provoi të gjente sërish avantazhin dhe pati sukses falë talentit të shtëpisë Mehdi Çoba i cili shënoi në minutën e 95 për të rikthyer skuadrën në avantazh dhe për t’i falur tre pikë që e dërgojnë ekipin në vendin e tretë me 49 pikë, ndërsa Kukësi mbetet në vendin e pestë me 46 pikë.
VAZHDO TË LEXOSH MË TEPËR PËR TEMËN
Dinamo rrëzon Skënderbeun, mbijeton Teuta
Laçi likuidon edhe Kastriotin, vuloset vendi i dytë
