Kryeministri Edi Rama ndodhet në Bruksel ku do të marrë pjesë sot pasdite në takimin e liderëve të Ballkanit Perëndimor me praninë edhe të shefit të Diplomacisë Europiane, Josef Borrel.
Në takim mësohet se do të jetë i pranishëm Presidenti serb Aleksandër Vuçic, ndërsa Kryeministri i Kosovës Albin Kurti dhe ai i Malit të Zi, Dritan Abazoviç.
Mes tyre do të diskutohet për çështjen e hapjes së negociatave ndërkohë pritet që edhe “Open Balkan” do të jetë në rendin e ditës. Gjithashtu, pritet të diskutohet edhe lufta në Ukrainë; harmonizimi i politikave të Ballkanit Perëndimor dhe kriza e sigurisë në kontinentin evropian.
Mësohet se tradita e organizimit të darkave me liderë nga Ballkani Perëndimor është iniciuar nga ishkryetarja e Diplomacisë së BE-së, Federica Mogherini, si një mënyrë për të inkurajuar dhe përmirësuar bashkëpunimin brenda rajonit dhe rajonit me BE-në. Ndërsa në fund të darkës, ato priten që t’u drejtohen mediave në Bruksel.
Presidenti i Francës, Emmanuel Macron, paralajmëroi dje se mund të duhen dekada që Ukraina të anëtarësohet në BE dhe propozoi krijimin e një organizate të re politike për të bashkuar vendet e kontinentit që ndajnë vlerat e BE-së, por që nuk janë pjesë e bllokut.
Sipas vizionit të kreut të Elizesë, pjesë e këtij komuniteti të ri do të ishin edhe vendet e Ballkanit Perëndimor, Gjeorgjia dhe Moldavia.
“Pyetja që ngrihet është: si duhet ta organizojmë Europën, në mënyrë politike që shkon përtej BE-së. Është detyra jonë t’i përgjigjemi dhe të krijojmë atë që unë do ta quaja sot, ‘komuniteti politik europian’. Kjo do të ishte një organizatë e re europiane që do të lejonte vendet demokratike që ndajnë vlerat bazë me ne, të gjejnë një hapësirë të re bashkëpunimi në fusha të ndryshme”, u shpreh Macron.
Sipas tij, një procedurë e përshpejtuar për Ukrainën, sikundër propozon presidentja e Komisionit Europian do të nënkuptonte ulje të standardit. Presidenti francez shtoi se anëtarësimi në këtë organizatë të re nuk do të garantonte bashkimin e ardhshëm me bllokun.
Ideja u mirëprit nga kancelari gjerman, Olaf Sholc, i cili priti në Berlin kreun e Elizesë mbrëmjen e 9 majit. Lideri gjerman u përcolli vendeve të Ballkanit Perëndimor mesazhin se u qëndrojnë premtimit për anëtarësimin e tyre, ndërsa kërkoi tejkalim të bllokadave në emër të përgjegjësisë europiane dhe interesave strategjike.
VAZHDO TË LEXOSH MË TEPËR PËR TEMËN
Çfarë pret Ballkani nga BE në 2020?
“Jam optimist për hapjen e negociatave me Shqipërinë”
Ballkani Perëndimor mes Brukselit dhe Parisit
