Partia Demokratike nuk do të jetë sot në seancë plenare për të kundërshtuar buxhetin e vitit 2019 të sjellë në Parlament nga maxhoranca.
Por paralelisht me Parlamentin, Partia Demokratike ka thirrur një seancë paralele me grupe interesi, që preken drejtpërdrejt nga buxheti i sjellë nga shumica.
Nënkryetarja e Komisionit të Ekonomisë, Jorida Tabaku, do të drejtojë takimin në të cilin janë ftuar të marrin pjesë shoqata të biznesit, biznesmenë, grupe interesi, fermerë, pronarë dhe përfaqësues të ish-të përndjekurve politikë.
Opozita e ka kundërshtuar buxhetin e sjellë nga maxhoranca në Parlament, duke kujtuar se ndryshe nga se është premtuar, borxhi publik është rritur akoma më shumë. Në takimin e sotëm, edhe një herë kreu i PD-së, Lulzim Basha, pritet të paraqesë alternativën e opozitës për rritjen ekonomike dhe fuqizimin e sektorëve të veçantë.
PD ka premtuar një plan për subvencione në sektorin e bujqësisë, me 150 milionë euro në vit gjatë qeverisjes së saj. Sipas Bashës, kjo skemë subvencionesh do të shkojë te çdo familje fermere në bazë të prodhimit të tyre.
