Kryeministri Edi Rama ka mbledhur ditën e sotme kryebashkiakët për të listuar disa objektiva pas hapjes së negociatave.
Rama vlerësoi drejtimin e kryebashkiakëve duke i kategorizuar ata në shembullore, të mira dhe problematike. Ai vlerësoi maksimalisht kryetarin e bashkisë së Lezhës Pjerin Ndreu ndërsa nuk ka pa sulmuar kryebashkiakun e Vlorës Dritan Leli, duke thënë se ai fle gjumë pavarësisht potencialit që ka qyteti që ai drejton.
“Negociatat nuk janë shëtitje në lëndinë. Janë një e përpjetë me kërkesa shumë strikte dhe të forta dhe me detyrime që përbëjnë një barrë të madhe për secilin që ka një funksion publik. Qoftë si i zgjedhur apo i besuar në administratën shtetërore. Qeverisje vendore janë bashkitë dhe njësitë administrative që janë Partia Socialiste e Shqipërisë sepse jemi ne që qeverisim në të gjithë territorin.
Nuk është uniforme në aspektin e cilësisë. Kemi bashki që janë shembullore dhe bashki që janë të mira dhe disa bashki që janë problematike. Të qenit problematike për PS do të thotë të qenit PS problematike për qyetarët. Kemi të gjithë kohën për të adresuar problemet dhe për të kapur trenin ku janë më të mirët prej jush. Në të gjitha fushat e qeverisjes vendore kemi shembuj për të qenë krenarë.
Është krenari që PS drejton Lezhën po të shikojmë nivelin e higjenës në plazh dhe nivelin e kënaqësisë që kanë ata që pushojnë në atë vijë bregdetare për shkak të punës së bashkisë. Të tillë shembuj ne kemi kudo në gjithë Shqipërinë deri në bashki të vogla të cilat kanë mundësi të kufizuara por për shkak të drejtimit dhe punës sistematike janë shembuj pozitivë që nga shembulli i Cërrikut që është një bashki me halle të mëdha të trashëguara, që është një bashki që për shkak të pozicionit gjeografik ka qenë si e lënë pas dore. Lidershipi ka bërë diferencë.
Kemi bashkinë e Belshit që vazhdon të jetë një bashki shembullore. Ngopja me pushtetin është e atyre që harrojnë që kush i ka çuar atje dhe pse i ka çuar atje. Nuk është sa herë njerëzit i kanë besuar. Kjo ndodh në Belsh. Flas për dy bashki në Elbasan të cilat nuk janë bashki që kanë pasur ndonjë avantazh. Kanë qenë të disavatazhuara. Sepse nivelin e pagesës së taksave e kanë shumë modest. Kemi bashki si Vlora që ka pasur një vëmendje të veçantë nga qeveria por që ka një kryetar bashkie që fle gjumë. Vlora me gjithë atë potencial që ka”, u shpreh ai.
Ai theksoi se Shijaku ka treguar shembull lidershipi edhe për bashki të mëdha si Tirana dhe Shijaku. “Qytetet duhet të jenë minimalisht xix, në mëngjes drekë dhe darkë. Pa folur për bashki të cilat kanë potenciale të mëdha siç është Pogradeci.
Në ndërkohë është një shembull pasi me mjetet e kufizuara që ka bashkia, falë këmbënguljes së kryetarit të bashkisë po merr frymë lirisht qyteti. Tjetër realitet objektivisht i vështirë është Mati. Shkoni shikoni bashkinë e Matit se çfarë mund të bëjë individi kur nuk harron se pse është aty dhe kur përpiqet të lërë gjurmë. Ne patëm procesin e rindërtimit dhe bashkia më shembullore përfshirë dhe Tiranën është Shijaku. Në çdo hap një përgjigje e institucionit sikur të ishte një institucion perëndimor. Mos vallë erdhën nga Gjermania apo Franca punonjësit e Shijakut që nuk shkelën asnjë afat. Shumica e njerëzve në bashkinë e Shijakut janë të njëjtë me ata që kanë qenë, por ndryshoi lidershipi.
Është bashki kampione ndërkohë që Tirana dhe Durrësi kanë çfarë të mësojnë nga bashkia e Shijakut. Këtu po bëj diferencën duke evidentuar disa bashki që nuk i kanë kushtet që kanë bashkitë e mëdha. Kanë shumë për të nxjerrë nga kapacitetet e tyre të natyrshme. Janë disa gjëra të cilat janë vetëm çështje vullneti dhe çështje durimi. Është bërë një transformim i madh pas zgjedhjeve dhe nën ministren e Mjedisit dhe Turizmit për pastrimin, por dhe sepse vendosëm dhe një vijë të kuqe se nuk na duhet asgjë tjetër nëse nuk mbajmë shtëpinë e pastër”, deklaroi Rama.
VAZHDO TË LEXOSH MË TEPËR PËR TEMËN
