Një anije “kërkimore” ruse, që mendohet të jetë potencialisht një anije spiune, po gjurmohet në brigjet e Mbretërisë së Bashkuar mes frikës së një sulmi në infrastrukturën World Wide Web.
Marina Mbretërore është duke e kontrolluar anijen pasi ajo ndryshoi papritur drejtim dhe shkaktoi frikën se mund të jetë atje si pjesë e një komploti për të nisur një sulm ndaj kabllove nënujore.
Anija në pronësi të qeverisë ruse, e quajtur Akademikja Boris Petrov, u largua nga porti i saj në Kaliningrad të hënën (17 tetor) dhe u nis për të lundruar përmes Kanalit Anglez dhe më tej në vendin e një ekspedite shkencore në Atlantikun e Jugut.
Megjithatë sot (21 tetor) u raportua se anija kishte ndryshuar kurs dhe tani pritet të lundrojë pranë ishujve skocezë në ditët në vijim pasi u ngadalësua në mënyrë drastike ndërsa kalonte fushat e naftës norvegjeze në Detin e Veriut.
Sipas të dhënave të lundrimit, anija është gjithashtu e pozicionuar për të kaluar nëpër ujëra jashtë bazës detare Faslane – shtëpia e parandalimit bërthamor të Mbretërisë së Bashkuar.
Më pas do të kalojë mbi veriperëndim të Irlandës, ku ndodhet infrastruktura kritike për një sërë kabllosh transatlantike.
Sipas The Week, kabllot me fibra optike që qarkullojnë midis Shteteve dhe Evropës janë “shtylla kurrizore” e World Wide Web që ne jemi mësuar ta përdorim çdo ditë – të paktën 95% e komunikimeve globale ‘udhëtojnë’ përmes kabllove.
