Studentë të Fakultetit të Inxhinierisë së Ndërtimit, Arkitekturës dhe Urbanistikës kanë dalë këtë të mërkurë në protestë, kundër rritjes së tarifave arsimore nga qeveria.
Mes të tjerave, studentët kërkojnë heqjen e tarifës prej 670 lekësh për kredit për çdo provim të bartur, ndërkohë që pagesa për vitin akademik kërkohet të bëhet në janar.
Dhjetëra studentë janë parë të mblidhen në oborrin e fakultetit në fjalë, pjesë e Universitetit Politeknik të Tiranës, e më pas kanë vijuar me një marshim në rrugët e kryeqytetit me destinacion Ministrinë e Arsimit dhe Sportit.
Me të mbërritur atje, edhe për shkak të bllokimit të trafikut në rrugën e Durrësit, nga Ministria e Arsimit ka dalë zëvendësministrja Besa Shahini, e cila ka kërkuar prej studentëve një përfaqësi.
