Shtetet e Bashkuara njoftuan se mbështesin propozimin e Bashkimit Evropian për normalizimin e marrëdhënieve ndërmjet Kosovës dhe Serbisë dhe u bënë thirrje liderëve të të dyja vendeve që të jenë konstruktivë.
“Ne presim që të dy udhëheqësit t’i qasen takimit me frymë konstruktive të nevojshme për të ecur përpara”, thuhet në përgjigjen e Departamentit të Shtetit për Zërin e Amerikës, më 24 shkurt.
Sipas njoftimeve, presidenti i Serbisë, Aleksandër Vuçiç dhe kryeministri i Kosovës, Albin Kurti, do të takohen në Bruksel të hënën, më 27 shkurt.
Para tyre është vendosur një plan i mbështetur nga Bashkimi Evropian dhe SHBA-ja, i njohur si propozimi franko-gjerman për marrëdhëniet e ardhshme ndërmjet Kosovës dhe Serbisë.
Departamenti i Shtetit i tha Zërit të Amerikës se është e rëndësishme që Serbia dhe Kosova të përdorin bisedimet për të shprehur angazhimin e tyre për një të ardhme paqësore për gjithë rajonin.
“Serbia dhe Kosova duhet të arrijnë një marrëveshje gjithëpërfshirëse përmes dialogut. Ne besojmë se marrëdhëniet e normalizuara ndërmjet Kosovës dhe Serbisë në fund të fundit duhet të synojnë njohjen reciproke. Progresi në dialog do të hapë derën e integrimit evropian dhe është thelbësor për sigurinë dhe stabilitetin në Ballkanin Perëndimor”, thuhet në përgjigjen me shkrim të Departamentit të Shtetit.
Në atë dokument, i cili u mbështet publikisht nga SHBA-ja, Gjermania dhe Franca, nuk përmendet qartë njohja reciproke apo anëtarësimi i Kosovës në Organizatën e Kombeve e Bashkuara.
Ndërkohë, propozimi i BE-së është pranuar në parim nga kryeministri i Kosovës dhe presidenti i Serbisë./VOA
VAZHDO TË LEXOSH MË TEPËR PËR TEMËN
“Beogradi e Prishtina të kthehen në tavolinën e bisedave”
“Pas idesë së shkëmbimit të territoreve qëndron…”
“Kosova dhe Serbia, po ta njihnin njëra-tjetrën…”
