Të premten kryeministri i Kosovës, Albin Kurti, ka zhvilluar një bisedë telefonike me këshilltarin e lartë të Departamentit amerikan të Shtetit, Derek Chollet, për dialogun me Serbinë, që ndërmjetësohet nga Bashkimi Evropian.
Kjo bisedë telefonike mes Kurtit dhe Chollet zhvillohet tre ditë para se kryeministri i Kosovës dhe presidenti i Serbisë, Aleksandar Vuçiç, të zhvillojnë rundin e ri të bisedimeve në Bruksel.
E rreth asaj se çka u bisedua në mes Kurtit e Cholletit, ka treguar vet Këshilltari i Departamentit të Shtetit. Përmes një postimi në rrjete sociale, Chollet thotë se tani është momenti për të diskutuar për asociacionin e komunave serbe.
“Shpreha qëndrimin se është koha për të diskutuar për Asociacionin e Komunave serbe. Si Kosova, ashtu edhe Serbia duhet të zbatojnë marrëveshjet të cilat tashmë i kanë nënshkruar gjatë procesit të dialogut”, shkroi Chollet në Twitter.
Chollet u shpreh gjithashtu se të dyja palët duhet të zbatojnë të gjitha marrëveshjet e arritura në dialog.
“ShBA-të mbështesin një takim konstruktiv që afirmon përkushtimin e të dyja palëve ndaj propozimit të BE-së”, është shprehur Chollet.
Në 6 shkurt pas një takimi me Miroslav Lajçak, të dërguarin e Posaçëm të BE-së, Albin Kurti bëri me dije se do të pranojë planin franko-gjerman për të bërë të mundur normalizimin e marrëdhënieve mes Kosovës dhe Serbisë.
VAZHDO TË LEXOSH MË TEPËR PËR TEMËN
Këshilltari i Blinken kërkon që Bullgaria të heqë veton
DASH: Kosova e Serbia të krijojnë klimë për pajtim
