Partizani dhe Tirana do të luajnë derbin e fazës së tretë të hënën e ardhshme më 6 mars, por ende nuk është saktësuar stadiumi se ku do të luhet ndeshja mes dy pretendentëve për titull.
Drejtori sportiv i Partizanit pak ditë më parë la të hapur mundësinë që derbi mund të luhet edhe në kompleksin e ri. Kjo shkaktoi polemika dhe reagime në rrjetet sociale, sidomos nga tifozët e Tiranës, sepse do të ishin më të penalizuarit në një stadium me kapacitet 4 mijë vende.
Sipas rregullores (5 për qind për miqtë), në stadium do të lejoheshin vetëm 200 tifozë të Tiranës. Partizani ka gjithë të drejtën ta bëjë këtë manovër, përkundër pakënaqësive që mund të shkaktonte. Megjithatë, asgjë nuk është vendosur dhe sot pritet që të merret një vendim përfundimtar për impiantin se ku do të luhet derbi.
