Ish-presidenti i FIA-s, Jean Todt ka bërë të qartë se aksidenti i Michael Schumacher ka pasur pasoja dhe ka kërkuar që ta lënë të qetë familjen e legjendës së Formula 1. Miku i mirë i familjes së gjermanit e viziton legjendën e F1 të paktën një herë në muaj në vilën e tij në Gjenevë. Në dhjetor të 2013, kampioni i 7-fishtë i botës në Formula 1 pësoi një aksident duke bërë ski dhe prej asaj kohe është në gjendje kome të induktuar.
“Ta lëmë të qetë. I respektojmë dëshirat për privatësi të Corinnas dhe fëmijëve të saj, edhe pse e dimë me siguri që aksidenti ka pasur pasoja. Por, kushdo që thotë se di diçka, nuk di asgjë”, tha fillimisht ish-kreu i skuderisë italiane.
Më pas Todt u ndal edhe te familja e legjendës së Ferrarit dhe te privatësia e domosdoshme.
“Unë gjithmonë shkoj për ta vizituar. Ai dhe familja e tij, janë familja ime”, ka deklaruar 77-vjeçari për gazetën italiane, Corriere della Sera.
Gjatë kohës që ishte shef ekzekutiv i Ferrarrit, Todt ka shijuar suksese të mëdha me Schumacher si pjesë të “Kokëkuqes”, i cili fitoi pesë tituj radhazi (2000-2004) kampion bote në Formula 1.
