Kampioni i botës në Formula 1, Max Verstappen është kundër mënyrës së re të provave që pritet të aplikohet në Çmimin e Madh të Bakusë në 28 prill. Drejtuesit kanë vendosur që të ketë më shumë adrenalinë edhe në provat zyrtare, me pilotin e Red Bull që është kundër organizimit të ri. Pritet që gara sprint në Baku të japë pikë për 8 të parët dhe jo të përcaktojë renditjen e pilotëve në garën e së dielës, që do të vendoset nga provat zyrtare të së premtes.
“Nuk mendoj se është në ADN-në e Formula 1 që të organizojë këto lloj eventesh. Ky sport duhet t’i çojë pilotët që të japin maksimumin në provat zyrtare dhe më pas të duelojnë për fitoren në garë. Kjo është ADN-ja e Formula 1 dhe nuk e kuptoj këtë dëshirë për ta ndryshuar. Mendoj se spektakli nuk ka munguar, duke ulur shpenzimet dhe afruar skuadrat me njëra-tjetrën”, tha piloti i Red Bull.
Verstappen duket se dëshiron të qëndrojë me të vjetrën, teksa kërkon që të anullohen provat e së premtes për shkak të ngarkesës.
“Duke bërë gjithë këto ndryshime harrojmë se sa e shpejtë është fundjava për ne, sa kaotike bëhet fundjava, pa harruar që zhvillojmë shumë gara. E kuptoj dëshirën për të patur më shumë emocione, por po e çojmë Formula 1 në drejtim të gabuar. Të evitojmë provat e së premtes dhe ta bëjmë fundjavën më interesante”, tha Verstappen.
