Gjykata e Posaçme për Korrupsionin dhe Krimin e Organizuar, ka pranuar kërkesën e SPAK për vendosjen e sekuestrove preventive për katër apartamentet që më herët kanë qenë në pronësi të ish-zv.kryeministrit Arben Ahmetaj.
Këto apartamente të cilat rezultojnë që më herët kanë qenë në pronësi të ish-ministrit, dyshohet se janë shitur në mënyrë fiktive te persona të tjerë. Sipas SPAK katër apartamentet janë përfituar në mënyrë të paligjshme nga Ahmetaj.
Sot oficerët e BKH-së në kuadër të hetimeve që po kryen për Ahmetajn zhvilluan një sërë kontrollesh në banesat e ish-ministrit në Tiranë, por jo vetëm, edhe në shtëpitë e familjarëve dhe bashkëjetueses së tij, Erjola Hoxha në Hamallaj.
Nga kontrollet e kryera nga agjentët e BKH mësohet se njëra nga banesat e marra me qira nga Ahmetaj në Tiranë, ishte e boshatisur dhe nuk është gjetur asnjë provë. Rezultoi se ish-ministri Arben Ahmetaj nuk ka asnjë banesë të regjistruar në emrin e tij.
Arben Ahmetajt i është hequr nga imuniteti i deputetit, i cili u votua katër ditë më parë në Kuvend, duke i hapur rrugë kështu kërkesës së SPAK për arrestimin e tij. Ky i fundit nuk ndodhet në Shqipëri prej disa ditësh dhe avokati i tij deklaroi që Ahmetaj ndodhet në Britani të Madhe.
Kujtojmë se pasi Kuvendi miratoi heqjen e imunitetit, Prokuroria e Posaçme dërgoi në gjykatë kërkesën për arrestimin e ish-ministrit Arben Ahmetaj. Bëhet me dije se bashkë me kërkesën për arrestimin, SPAK kërkoi edhe leje për kontrollin e banesave të tij.
