UEFA njoftoi shtyrjen e ndeshjes së AEK-ut të Athinës kundër Dinamo Zagrebit. Federata Evropiane sqaroi se kushtet e krijuara pas incidenteve të dhunshme mes tifozëve në Athinë dhe vdekjes së një 29-vjeçari nuk lejojnë zhvillimin e ndeshjes për raundin e tretë kualifikues të Ligës së Kampionëve, ndaj do të shtyhet në datën 18 ose 19 gusht.
Sa i përket ndeshjes në Zagreb, ajo do të zhvillohet normalisht në datën 15 gusht. Ndër të tjera, UEFA thekson: “Pas shpërthimit të dhunës së djeshme dhe pas konsultimit me autoritetet lokale, UEFA ka vendosur që nuk ka kushte të përshtatshme për zhvillimin e ndeshjes.
Ndeshja Dinamo-AEK do të zhvillohet si zakonisht më 15 gusht. Jemi në kontakt me dy klubet për të konfirmuar datën e ndeshjes AEK-Dinamo, ose të premten, më 18 të muajit gusht, ose të shtunën, më datë 19. Ndalimi i lëvizjes së tifozëve kundërshtarë në shtetet respektive mbetet në fuqi”, njofton UEFA.
