Një 20-vjeçar është arrestuar në Librazhd pasi lëvizte me kallashnikov në çantë.
Stiven Faqollli u arrestua nga policia pas informacioneve që i riu po lëvizte në këmbë me kallashnikov në çantë. Nga kontrolli në çantën e të riut, shërbimet e Policisë gjetën dhe sekuestruan, 1 armë zjarri kallashnikov dhe municion luftarak për të. Policia po punon për zbardhjen e rrethanave të rastit dhe qëllimin e lëvizjeve të 20-vjeçarit.
NJOFTIMI I POLICISË:
Lëvizte me këmbë, në fshatin Qukës, me kallashnikov në çantë, si rezultat i inteligjencës policore, arrestohet në flagrancë 20-vjeçari. Sekuestrohen arma e zjarrit kallashnikov, krehra dhe fishekë të saj.
Specialistët e Seksionit për Hetimin e Narkotikëve dhe ata të Forcës së Posaçme Operacionale, të DVP Elbasan, në vijim të kontrollit permanent të territorit, për garantimin e rendit dhe sigurisë publike, kanë siguruar informacione se një shtetas lëvizte në fshatin Qukës, me armë zjarri me vete.
Në bazë të këtyre informacioneve, në bashkëpunim me shërbimet e Komisariatit të Policisë Elbasan, është organizuar dhe finalizuar operacioni policor i koduar “Bushtrica”, si rezultat i të cilit, është kapur dhe arrestuar në flagrancë shtetasi S. F., 20 vjeç, banues në fshatin Qukës. Nga kontrolli në çantën e këtij shtetasi, shërbimet e Policisë gjetën dhe sekuestruan me cilësinë e provës materiale, 1 armë zjarri kallashnikov dhe municion luftarak për të.
Në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Elbasan, vijojnë hetimet për zbardhjen e rrethanave të këtij rasti dhe të qëllimit të këtij shtetasi. Materialet procedurale i kaluan Prokurorisë, për veprime të mëtejshme, për veprën penale “Mbajtja pa leje dhe prodhimi i armëve, armëve shpërthyese dhe municionit”.
