Shenjat paralajmëruese se lufta e Izraelit me Hamasin mund të shndërrohet në një konflikt më të gjerë në Lindjen e Mesme kanë filluar të duken kudo. “Probabiliteti i përshkallëzimit ekziston dhe Amerika nuk dëshiron të shohë zhvillimin e një fronti të dytë apo të tretë”, siç tha të dielën Sekretari i Shtetit Anthony Blinken. Ndërsa konflikti kërcënon të përshkallëzohet në një luftë më të gjerë me Iranin dhe një rrjet grupesh islamike të mbështetura nga Irani nga Jemeni dhe Iraku në Siri dhe Liban, SHBA ka dërguar dy nga aeroplanmbajtëset e saj në zonë. Po ashtu, me urdhër të Presidentit amerikan, Joe Biden, avionët ushtarakë amerikanë, sulmuan grupet e militantëve të mbështetur nga Irani në Siri, të cilët kishin sulmuar trupat amerikane në vend dhe në Irak. Si Izraeli ashtu edhe SHBA-ja theksojnë mbështetjen e Iranit për Hamasin dhe Hezbollahun, por nuk e akuzojnë drejtpërdrejt Iranin për sulmin e 7 tetorit. Ndërsa frika rritet, janë shfaqur prova që vetëm do t’i “hedhin benzinë zjarrit”, duke rrezikuar një përplasje mes dy vendeve.
Akuzat kundër Iranit
Zëdhënësi ushtarak izraelit Daniel Hagari hodhi të mërkurën një nga akuzat më të ashpra të Izraelit kundër Iranit deri më tani. “Para luftës, Irani e ndihmoi drejtpërdrejt Hamasin me para, trajnime, armë dhe njohuri teknologjike,” pohoi Hagari. Ai vuri në dukje se Irani aktualisht po ndihmon Hamasin me inteligjencë. Të enjten, gazeta amerikane “Wall Street Journal” publikoi detaje të stërvitjes së Hamasit në Iran në shtator, para sulmit të Hamasit ndaj Izraelit më 7 tetor, por ata theksojnë se nuk ka asnjë provë që palestinezët në Iran ishin trajnuar për atë sulm. Nuk ka asnjë provë që Irani ishte i përfshirë drejtpërdrejt në planifikimin ose autorizimin e sulmit të 7 tetorit, është qëndrimi zyrtar i SHBA. “WSJ” ka raportuar se rreth 500 luftëtarë palestinezë ishin në Iran në shtator për stërvitje speciale ushtarake. Anëtarët e Hamasit dhe Xhihadit Islamik Palestinez u trajnuan nga oficerë të Forcave Quds, njësia e operacioneve të jashtme të Korpusit të Gardës Revolucionare Islamike të Iranit. Stërvitjet u ndoqën nga zyrtarë të lartë palestinezë dhe gjenerali iranian Esmail Qaani, kreu i Quds, pretendon “WSJ”. Zyrtarët amerikanë dhe njerëzit e njohur me inteligjencën u thanë gazetarëve të “WSJ” se nuk kishin informacion mbi të cilin të bazonin pretendimin e tyre se Irani kishte kryer trajnime për të përgatitur palestinezët për 7 tetor. Media raportoi më parë se iranianët ndihmuan Hamasin të planifikonte sulmin, duke përmendur zyrtarë të Hamasit dhe Hezbollahut, një këshilltar të qeverisë siriane dhe një zyrtar evropian.
Ndihma nga Hamasi
Disa zyrtarë amerikanë thanë se Uashingtoni kishte inteligjencë “bindëse” që tregonte se liderët e Iranit ishin të befasuar nga sulmi i Hamasit. “Informacioni që kemi nuk tregon një lidhje të drejtpërdrejtë midis Iranit dhe sulmit të Hamasit më 7 tetor,” tha javën e kaluar zëdhënësi i Forcave Ajrore të SHBA, Pat Ryder. “Një operacion i tillë është shumë i vështirë për t’u kryer pa mbështetjen e Hezbollahut dhe forcave iraniane, Hamasi nuk është i aftë për të”, pohon eksperti Saeid Golkar nga Universiteti i Tenesit. Norman Roule, oficeri më i lartë i inteligjencës amerikane për Iranin nga viti 2008 deri në vitin 2017, thotë se Irani ka qenë prej kohësh i përfshirë në trajnimin dhe financimin e grupeve ushtarake në zonë, por kjo nuk do të thotë se ata organizuan sulmet e 7 tetorit. “Rrallëherë është e nevojshme që Irani të përfshijë njerëzit e tij,” thotë ai. Hamasi, dega islamike e Vëllazërisë Myslimane Suni, ka pasur faza të mira dhe të këqija të marrëdhënieve me Iranin shiit. Irani e ka mbështetur Hamasin me armë dhe para që nga themelimi i tij në vitet 1980, por ato u ndalën në vitin 2012 kur Hamasi mori anën në luftën në Siri kundër presidentit Bashar al- Assad, një aleat iranian. Megjithatë, Hamasi njoftoi në vitin 2017 se po merrte edhe një herë ndihmë nga Irani. Që atëherë, ata kanë marrë ndihmë më të konsiderueshme nga Irani, duke i lejuar ata të përdorin dronët dhe raketat e tyre për të shënjestruar Izraelin, sipas “WSJ”.
