Qeveria britanike e Rishi Sunak ka njoftuar sot riorganizimin e kabinetit, duke nisur me shkarkimin e sekretares së brendshme Suella Braverman, për shkak të deklaratave të saj të fundit në lidhje me luftën në Gaza.
Shkarkimi i Braverman, solli emërime të reja, por dhe dorëheqje.
Ndërsa priten dhe ndryshime të tjera, le të shohim se kush ka ikur dhe kush ka ardhur deri më tani.
Kush u emërua?
David Cameron
Ish-kryeministri David Cameron, i cili riktheu konservatorët në pushtet si pjesë e një koalicioni me Liberal Demokratët në vitin 2010, është rikthyer në qeveri si sekretar i jashtëm.
Shumë nga deputetët e partisë One Nation, më afër qendrës së politikës, mund të mirëpresin rikthimin e Cameron, i cili u siguroi atyre dy fitore në zgjedhjet e përgjithshme dhe është i njohur ndërkombëtarisht.
Por ai nuk vjen pa polemikat e tij, duke përfshirë politikat e tij shtrënguese, vendimet mbi Brexit, shtytjen e tij për lidhje më të ngushta me Kinën dhe akuzat për lobim kur punësohet nga Greensill.
James Cleverly
Pasi shërbeu si sekretar i jashtëm që nga shtatori i vitit të kaluar, kur u emërua nga kryeministrja e atëhershme Liz Truss, James Cleverly tani do të transferohet në Ministrinë e Brendshme si sekretar i brendshëm.
Duke postuar në Tëitter pas njoftimit, ai tha se ishte një “nder që u emërua”, duke shtuar: “Qëllimi është i qartë. Detyra ime është t’i mbaj të sigurt njerëzit në këtë vend.”
Jeremy Hunt
Jeremy Hunt do të mbetet kancelar, pasi është sjellë nga Truss pas katastrofës së mini-buxhetit të saj dhe është mbajtur nga Sunak.
Kush iku?
Suella Braverman
Siç kemi raportuar, Braverman është shkarkuar nga posti i sekretares së Brendshme dhe nuk është më ministre e asnjë lloji, ndaj do të rikthehet në bankën e pasme si deputete.
Në një deklaratë të lëshuar pas shkarkimit të saj, Braverman tha: “Ka qenë privilegji më i madh i jetës sime të shërbej si sekretare e Brendshme. Do të kem më shumë për të thënë në kohën e duhur.”
Është hera e dytë që ajo humbet punën e sekretares së brendshme, pasi dha dorëheqjen nga qeveria e Truss për thyerjen e kodit ministror.
Nick Gibb
Ministri i shkollave, Nick Gibb, ka thënë se është larguar nga qeveria dhe nuk do të kandidojë në zgjedhjet e ardhshme të përgjithshme, duke shtuar: “Kam bërë fushatë për Rishin verën e kaluar dhe mbetem një mbështetës entuziast i udhëheqjes së kryeministrit.”
Neil O’Brien
Ministri i Shëndetësisë Neil O’Brien gjithashtu njoftoi se ai do të largohet, pavarësisht se do të luajë një rol kyç në zbatimin e ndalimit të Sunak për pirjen e duhanit dhe avullimin në brezin e ri.
VAZHDO TË LEXOSH MË TEPËR PËR TEMËN
“Suella është e ikur”, The Times zbulon debatin brenda konservatorëve për të ardhmen e Braverman
Braverman ‘e ashpër’ me masat ndaj emigrantëve, u vendos byzylyk elektronik
Braverman: Nuk do bëj hap pas, britanikët dëshirojnë t’i ndalojnë varkat
