Ambasadori i ri i Bashkimit Evropian në Tiranë, Silvio Gonzato, ka zhvilluar takimin e tij të parë zyrtar me kryeministrin Edi Rama, ku si fokus ishte integrimi i Shqipërisë drejt Bashkimit.
Nëpërmjet një postimi në rrjetin social ‘X’, Gonzato bën me dije se gjatë takimit me Ramën ka diskutuar për hapat e mëtejshëm të Shqipërisë drejt integrimit në Bashkimin Europian dhe mënyrat sesi ai mund të ndihmojë në këtë rrugëtim.
“Takimi im i parë me kryeministrin Edi Rama! Ne folëm për hapat e ardhshëm të Shqipërisë në procesin e saj të integrimit në BE dhe se si unë dhe ekipi im mund ta shoqërojmë vendin në këtë rrugëtim sfidues, por premtues”, shkruan Gonzato.
Silvio Gonzato, pasues i Luigi Sorecas në postin e ambasadorit të BE-së në Shqipëri, më 7 dhjetor i dorëzoi presidentit Bajram Begaj letrat kredinciale. Para emërimit si Ambasador i BE-së në Shqipëri, ai ka qenë Ambasador, Zëvendës Shef i Delegacionit të Bashkimit Evropian në Kombet e Bashkuara në Nju Jork.
