Kreu i SPAK, Altin Dumani ka folur për çështjet më të nxehtë që tashmë ka në dorë Prokuroria e Posaçme, sic është hetimi për çështjen “McGonigal”, inceneratorët apo edhe ajo që lidhet me përdorimin e aplikacioneve Sky ECC dhe Ecrochat që ka zbuluar grupe kriminale, ku të përfshirë ka edhe punonjës policie.
Në një takim informal me gazetarët kreu i SPAK Altin Dumani konfirmoi regjistrimin e procedimit pas kallëzimit të bërë nga Gazment Bardhi.
Ai u shpreh se hetimet vazhdojnë, por nuk tha se në cfarë faze janë.
“Ne nuk mund të japim asnjë informacion. Kemi patur një kallëzues, e kemi informuar për gjithçka që ka kërkuar por i kemi kërkuar të nënshkruajë mbi ruajtjen e sekretit hetimor dhe të mos bëhen publike”, është përgjigjur Dumani.
Sa i takon aplikacioneve Encro Chat dhe Sky Ecc, Dumani tha se pothuajse në çdo material, ka emra të tyre të përfshirë, teksa foli edhe lidhur me çështjen e posedimit të një aparati të tillë, ku qëndrimi i tij nxjerr në pah përplasjen me ministrinë e brendshme që disa javë më parë komunikoi se çdo punonjës policie që i kanë përdorur duhet të përjashtohet nga strukturat.
“Mbajtja e këtyre aplikacioneve nuk përbën vepër penale, jo çdo bisedë që kryhej aty përben shkelje, por nëse ka komunikime që i kompromentojnë atëherë është çështje tjetër që verifikohen e merren masa. Por në çdo hetim na dalin një ose më shumë polic, gjithashtu nuk kanë munguar edhe në radhët e prokurorëve, ju marr shembull rast që tashmë është publik Xhevahir Lita”, u shpreh Dumani.
Për inceneratorin e Tiranës, Dumani tha se nuk ka fraksion të ndarë, por hetimet vazhdojnë për çdo aktor që ka kryer veprime apo mosveprime
“Është në fazë hetimesh paraprake që vazhdojnë në drejtim të çdo faktori që mund të kenë kryer veprime penale, apo persona të tjerë që kanë patur në duar vendimmarrje. Hetimet po bëhen në kuadër të të njëjtit procedim, jo me fraksion. Do sqarohet pozita e secilit, çdo veprim po verifikohet”, deklaroi kreu i SPAK.
VAZHDO TË LEXOSH MË TEPËR PËR TEMËN
Dosja McGonigal, Berisha s’i ndal sulmet ndaj Yuri Kim
Nesër mocion me debat për “McGonigal”, PD kërkon heqjen e limitit kohor
