“Bashkimi Evropian nuk mund të diskutojë të ardhmen e tij dhe identitetin evropian pa Serbinë, anëtarësimi i së cilës në BE është një interes gjeopolitik”, tha kryeministri hungarez Viktor Orban në Bled të Sllovenisë. “Ne kemi nevojë për Serbinë për shkak të gjeopolitikës,” tha kryeministri hungarez në Forumin Strategjik të Bled, një panel i fokusuar në të ardhmen e Evropës. “Serbia është kyçe. Pa Serbinë si anëtare të BE-së, nuk mund të diskutohet siguria apo identiteti evropian në përgjithësi. Anëtarësimi i Serbisë në BE na duhet më shumë sesa Serbia. Nëse nuk e integrojmë Serbinë sa më shpejt, do ta humbasim”, ka përfunduar Orban. Presidenti serb Vuçiç mori pjesë në panel si përfaqësuesi i vetëm i një vendi jashtë BE-së, së bashku me gjashtë kryeministra të BE-së, përfshirë kryeministrin kroat Andrej Plenkoviç. Vuçiç tha se Serbia ishte entuziaste për procesin e anëtarësimit në BE, por ai entuziazëm nuk është më aty. “Ne gjetëm mënyrat tona për të kapërcyer problemet ekonomike dhe krijuam mekanizmat tanë,” tha ai. Ai theksoi se vendi i tij është ende plotësisht i përkushtuar në rrugën e tij evropiane, por se “duhet të mbijetojë dhe të përmirësojë kushtet e jetesës së qytetarëve të tij”.
Vuçiç kritikon BE
Vuçiç kritikon BE-në, të cilën ai e cilësoi si “vendi më i mirë për të jetuar në botë”, se nuk shpërblen përparimin e vendeve kandidate kur ato plotësojnë disa nga kriteret për anëtarësim. “Maqedonia e Veriut ndryshoi emrin e saj, u premtua se do të nisë procesi i negociatave, a ndodhi kjo?” pyeti ai, duke iu referuar mosmarrëveshjes për emrin e Maqedonisë së Veriut me Greqinë dhe faktit se nisja e negociatave të anëtarësimit të saj tani po bllokohet. nga Bullgaria. “Nuk po ankohem, thjesht po them të vërtetën dhe ne jemi të vetëdijshëm për këtë”, tha ai. Presidenti i Këshillit Evropian Charles Michel tha në panel se BE-ja, e vetëdijshme se duhet të jetë më e dukshme në Serbi, ka rritur investimet në atë vend, gjë që konfirmoi Vuçiç.
Serbia nën kontrollin e Rusisë?
Ky alarm u ngrit dhe nga Gjermania pak ditë më parë. Ministri gjerman i Mbrojtjes, Boris Pistorius, ia tha në sy presidentit serb, se vendi i tij do të vazhdojë ta ndihmojë me armë dhe në fushën ushtarake Forcën e Sigurisë së Kosovës. Kjo ngjalli zemërimin e Vuçiç, i cili u detyrua të garantonte se Beogradi nuk do të befasojë askënd me lëvizje ushtarake. Një tjetër kritikë e sjellë nga Berlini, ishte ajo për raportet e ngushta mes Serbisë dhe Rusisë, duke paralajmëruar se kjo pengon rrugën drejt anëtarësimit në Bashkimin Evropian. “Sa është ndikimi i Rusisë në Serbi, do të jap përgjigje në këtë pyetje. Perceptimi ynë është se ka mjaft ndikim në shumë kanale. Serbia duhet të gjejë mënyrën e saj për t’u përballur me këtë dhe Serbia duhet të marrë përgjegjësinë dhe rolin e saj në rajon se si do të komunikojë për të gjitha vështirësitë me të gjitha gjërat, të cilat perceptohen si ndonjë provokim. Por nuk ka rrugë drejt BE-së përmes konflikteve në rajon dhe kjo duhet komunikuar qartë”, tha Pistorius. Po ashtu në seancën e fundit pak ditë më parë në Këshillin e Sigurimit të OKB-së në Neë York, Rusia mbajti një qëndrim të njëjtë me Serbinë. Gjatë fjalës së tij, përfaqësuesi i Federatës Ruse, Dmitry Polyanskiy, e akuzoi Kosovën se po kryen veprime që përbëjnë “spastrim etnik” që tha se po injorohen nga organizatat për të drejtat e njeriut. Ai paralajmëroi se në Ballkanin Perëndimor mund të shpërthejë një konflikt i ri, duke e krahasuar situatën e palestinezëve në Rripin e Gazës me serbët që jetojnë në Kosovë. Gjithashtu foli për vendimin e BQK-së, ku tha se ndalimi i dinarit është një hap kriminal dhe ua bën jetën e padurueshme qytetarëve serbë, sepse sipas ambasadorit rus, serbët rrezikojnë të mbesin pa paga, pensione dhe ndihma të tjera që pranojnë nga Serbia.
VAZHDO TË LEXOSH MË TEPËR PËR TEMËN
“Pas idesë së shkëmbimit të territoreve qëndron…”
“Kurti e Vuçiq të mos zhgënjejnë më 27 shkurt”
“Institucionet shqiptare të përshpejtojnë reformat për integrimin në Bashkimin Europian”
