Kryeministri hungarez Viktor Orbán do të takohet me ish-Presidentin e SHBA, Donald Trump, në Florida, javën e ardhshme. Ai tha se një rikthim i mundshëm i Trump, është mundësia e vetme për t’i dhënë fund luftës në Ukrainë.
Duke iu drejtuar një forumi të diplomacisë në Turqi, Orbán theksoi gjithashtu se kthimi i mundshëm i Trump në Shtëpinë e Bardhë mund të ndihmojë në përfundimin e konfliktit në Gaza.
Takimi i Orbanit me Trump vjen ndërsa ish-presidenti i SHBA-së kërkon të kthejë vëmendjen e tij tek përballja e tij e ardhshme zgjedhore me presidentin amerikan Joe Biden.
Pozicioni politik i Trump brenda partisë së tij duket më i fortë se kurrë, pasi ka fituar lehtësisht garat e hershme presidenciale republikane.
“E vetmja mundësi serioze për paqe është nëse ai është në gjendje të kthehet dhe të bëjë paqe. Përndryshe, lufta midis Ukrainës dhe Rusisë do të jetë e gjatë”, ka shtuar ai.
Kthimi i Trump “është një parakusht për një paqe të fortë dhe të shpejtë në kontinentin evropian”, vazhdoi ai.
Madje, Orbán tha se ishte i bindur se nëse Trump do të kishte qenë në detyrë kur filloi lufta në Ukrainë, “nuk do të kishte pasur luftë tani”.
Duke komentuar luftën në Gaza, kryeministri hungarez tha se Trump “bëri diçka që krijoi njëfarë shprese”, duke iu referuar marrëveshjeve të Abrahamit që synonin të normalizonin lidhjet midis Izraelit dhe shteteve të Gjirit.
Orbán dhe Trump kanë qenë aleatë të gjatë dhe Trump lavdëron rregullisht populistin e krahut të djathtë në fjalimet e tij të fushatës.
Trump në fillim të vitit 2022 tha se ai po jepte “mbështetjen dhe miratimin e tij të plotë” për fushatën e rizgjedhjes së Orbanit atë vit.
