Kryeministri Edi Rama në vizitën e tij dy ditore në Shkodër, një prej takimeve e zhvilloi me dy organizata të Partisë Socialiste në lagjen “Xhabiej”.
Në këtë takim kreu i qeverisë ka dhënë disa mesazhe për anëtarësimet në PS duke kërkuar që Shkodra të vijojë me këto ritme dhe PS të ketë dyert e hapura edhe për demokratët për t’u bërë një parti gjithëpërfshirëse.
“Duhet që të vazhdojë fuqishëm puna për anëtarësimet në PS. Shkodra deri tani është qarku me numrin më të lartë dhe duhet që të vijojë me këtë ritëm. PS duhet që të jetë një parti gjithëpërfshirëse, të hapë dyert për të gjithë, të majtë e të djathtë, të mos jetë një parti hermetike dhe e ngurtësuar. Duhet të afrojmë edhe demokratët. Beneti i përfaqëson të djathtët kështu që demokratët e kanë derën e hapur”, deklaroi kryeministri, raporton News24.
Kreu i qeverisë në këtë takim foli edhe për investimet në Shkodër duke thënë se ky qytet i lënë pas dore nga kryebashkiakët e mëparshëm të PD tashmë është prioritet i qeverisë.
“Shkodrën duhet që ta kapim në dorë Benet, kemi shumë punë. Ashtu si kanë lënë uzinën e telave të shkatërruar ashtu kanë lënë edhe Shkodrën. Edhe tek stadiumi ‘Loro Boriçi’ kemi bërë një investim të madh por e kanë lënë pas dore si çdo gjë në Shkodër. Duhet ta kthejmë në një turizëm sportiv stadiumin, të rikonceptohet ndryshe dhe të mirëmbahet si duhet. Shkodra është prioriteti ynë dhe të jeni të sigurt se qeveria do të ketë një vëmendje të veçantë për investime të mëdha në Shkodër”, tha kreu i qeverisë.
Rama la edhe një porosi tjetër që PS të jetë një parti më digjitale dhe të përdoren më shumë rrjetet sociale për reklamime sepse kanë efekt pozitiv tek qytetarët dhe krijojnë interes.
“Partia duhet që të jetë më digjitale. Reklamoni gjërat në Instagram sepse ka shumë efekt. Unë për vete nuk jam ndonjë fans i madh por kur më ka dërguar kryetari i Bashkisë Vau Dejës Kristian Shkreli një video për Betlehemin dhe unë e kam postuar, kanë shkuar shumë njerëz për ta parë dhe e kanë postuar edhe ata”, u shpreh Rama.
Gjatë takimit nuk munguan as batutat në momentin kur një prej pjesëmarrësve i erdhi një telefonatë në celularin.
“Patjetër që do të jetë gruaja në telefon se kujton se je në kafe por thuaji se je këtu. Nëse nuk beson ma jep mua që t’i flas”, tha kryeministri përmes humorit.
Pas takimit, kreu i qeverisë konsumoi një kafe në një lokal afër me drejtues politik të PS, kryetar bashkish të qarkut Shkodër dhe deputetë të PS.
VAZHDO TË LEXOSH MË TEPËR PËR TEMËN
