Nis konferenca e Kryetarëve, ku pritet të diskutohet ngritja e dy komisioneve hetimore të rëna dakord në negociatat mes PS-së dhe Rithemelimit për rikthimin në normalitet të Kuvendit mes PS dhe Rithemelimit.
Bëhet fjalë për koncesionet në shëndetësi si dhe rrjedhjen e të dhënave të qytetarëve dhe ndërhyrjet në sistemin TIMS.
Shumica socialiste arriti sot në një dakordësi me Rithemelimin për t’i dhënë fund kaosit Parlamentit nisur që prej muajit tetor të vitit që lamë pas.
Në takimet e javës së shkuar të mbajtur në zyrën e kryetares së Kuvendit, Lindita Nikolla, PS ka rënë dakord të shqyrtojë disa prej kërkesave të Rithemelimit bazuar në vendimin e gjykatës kushtetuese dhe ligjin e ri për komisionet hetimore.
Tejkalimi i bllokimit të parlamentit kalon përmes mekanizmave në Kryesinë e Kuvendit, ku platforma e propozimeve dhe diskutimeve, është Konferenca e Kryetarëve.
Në 5 Tetor 2023, opozita nisi një aksion në parlament për shkak se maxhoranca vendosi të rrëzojë:
1. Kërkesën e grupit parlamentar të PD për caktimin e përfaqësuesit të saj në komisionin e reformës zgjedhore.
2. Ngritjen e Komisionit Hetimor për kontratat koncesionare në shëndetësi.
3. Ngritjen e Komisionit Hetimor për ndërhyrjet në sistemin TIMS.
Në atë seancë opozita bllokoi procesin e votimit.
Maxhoranca e kreu votimin në 12 tetor 2023, duke rrëzuar tre kërkesat e grupit parlamentar të PD.
Rrëzimi i 2 kërkesave për Komisione Hetimore më 12 Tetor vinte pas faktit që mazhoranca që nga 2021 kishte refuzuar edhe 5 kërkesa të dorëzuara kohë më parë (2 dorëzuar nga grupi që në atë kohe drejtohej nga Basha dhe 3 dorëzuar nga grupi që drejtohej nga Berisha).
Opozita reagoi ashpër për votimin e njëanshëm të datës 12 Tetor për rrëzimin e dy Komisioneve Hetimore dhe ndryshimit të përbërjes së Komisionit të Reformës Zgjedhore dhe, nga seanca plenare e 19 Tetorit, nisi një aksion në Parlament për të pamundësuar veprimtarinë normale në Komisionet Parlamentare dhe seancave plenare.
Opozita shpalli publikisht tre kërkesa për të lejuar normalitetin në Parlament:
1. Lejimin e kontrollit parlamentar përmes pranimit të kërkesave të opozitës për ngritjen e Komisioneve Hetimore, një e drejtë kushtetuese e opozitës që nuk varet nga vullneti i shumicës parlamentare;
2. Lejimin e Grupit Parlamentar të PD për t’u përfaqësuar në Komisionin e Posaçëm Parlamentar të Reformës Zgjedhore, me kryetarin dhe anëtarët që përzgjidhen nga vetë opozita, duke hequr menjëherë dorë nga loja e emërimit të opozitës në Kuvend;
3. Shqyrtimin në kohë të propozimeve ligjore të deputetëve të opozitës, që prej 2 vjetësh mbahen pezull dhe nuk futen në procedurë parlamentare.
Nga ky moment, për 5 muaj, Kuvendi është përfshirë nga përplasjet mes palëve, duke mos zhvilluar mbledhje normale në Komisione dhr senacë plenare.
VAZHDO TË LEXOSH MË TEPËR PËR TEMËN
