Çmimi i qumështit të lopës ka rënë sërish dhe kjo ka sjellë reagimin e blegtorëve dhe veterinerëve.
Presidenti i Urdhrit të Veterinerëve, Ervin Resuli, shprehet se një tjetër ulje e çmimit po i kushton shumë blegtorëve, duke i lënë ata në një gjendje të pasigurt dhe pa asnjë fitim të dukshëm. Përmes një reagimi, ai kërkon ndërhyrje nga Autoriteti i Konkurrencës për mbrojtjen e blegtoreve, “që përballen me sfida të mëdha në një treg të dominuar nga lojërat e ‘kartelit’ dhe mungesa e veprimit nga institucionet shtetërore”.
“Nuk është thjesht një shprehje kur thuhet se ‘peshku i madh ha të voglin’, sidomos kur flasim për tregun e qumështit në Shqipëri që nga prilli i vitit 2023. Çmimi i qumështit të lopës ka rënë në tre raste të ndara, duke arritur një ulje totale prej 15 lekë për litër. Sikur kjo të mos mjaftonte, ‘karteli i qumështit’ ka njoftuar blegtorët për një ulje shtesë prej 3 lekësh për litër, duke sjellë një ulje totale prej 19 lekësh për litër brenda vetëm një viti, në katër raste të ndryshme. Ironia qëndron në faktin se ajo që shteti u jep blegtoreve, ‘karteli’ ua merr, duke krijuar një lloj skllavërie moderne në zemër të Europës, ku blegtorët janë të detyruar të përballen me vështirësi të mëdha ekonomike.
Për 50 krerë lopë që prodhojnë mesatarisht 1000 litra qumësht në ditë, qeveria shqiptare dhe Ministria e Bujqësisë ofrojnë një ndihmë financiare prej 5 milionë lekësh të vjetra. Megjithatë, ulja prej 3 lekësh për litër i kushton këtij blegtori që prodhon 1000 litra qumësht gati 10 milionë lekë të vjetra, duke i lënë ata në një gjendje të pasigurt dhe pa asnjë fitim të dukshëm.
Ndërkohë, ‘karteli’ jo vetëm që merr pjesën e ndihmës financiare që u takon blegtorëve, por gjithashtu rrit çmimet e bulmetit në treg për konsumatorët, duke krijuar një cikël të vështirë për të thyer. Kjo situatë kërkon ndërhyrje të menjëhershme në dy fronte: së pari, qeveria duhet të ndërpresë skemën kombëtare që lejon këtë shpërdorim financiar, pasi nuk ka ndikim pozitiv në ekonominë blegtorale. Së dyti, drejtori i Autoritetit të Konkurrencës duhet të përballet me përgjegjësi ligjore për mungesën e veprimit ndaj ‘kartelit’, veçanërisht kur ka prova që tregojnë se disa përpunues të ‘kartelit’ kanë pranuar se çdo gjobë të paguar ndaj Autoritetit të Konkurrencës do të rikuperohet përsëri nga blegtoret, duke përfshirë edhe uljen prej 3 lekësh për litër si pjesë të marrëveshjes së fundit me ‘kartelin’.
Ky apel për ndërhyrje është një thirrje për drejtësi dhe mbrojtje të blegtoreve, që përballen me sfida të mëdha në një treg të dominuar nga lojërat e ‘kartelit’ dhe mungesa e veprimit nga institucionet shtetërore.”
VAZHDO TË LEXOSH MË TEPËR PËR TEMËN
A do të ketë mungesë ushqimesh?
A do të ketë ulje të çmimit të bulmeteve?
Braktisja e fshatit çojnë në tkurrjen e numrit të krerëve
