Shira të dendur kanë goditur Emiratet e Bashkuara Arabe, duke përmbytur autostradat kryesore dhe duke ndërprerë fluturimet në aeroportin ndërkombëtar të Dubait.
Kjo regjistron sasinë më të madhe të reshjeve në 75 vitet e fundit në këtë vend.
Emiratet e Bashkuara Arabe shënuan deri të martën në orën 21:00 sasinë më të madhe të reshjeve gjatë një periudhe 24-orëshe që nga fillimi i regjistrimeve në vitin 1949, sipas Qendrës Kombëtare të Meteorologjisë.
Qendra tha se 254 mm shi u regjistruan në më pak se 24 orë në Al Ain, pjesë e emiratit të Abu Dhabit që kufizohet me Omanin.
Rrugët e qyteteve janë kthyer në ‘lumenj’ ndërsa uji i vrullshëm ka përmbytur qytete dhe biznese.
Një video po qarkullon në rrjet ndërsa Aeroporti Ndërkombëtar i Dubait është nën ujë. Avionët e mëdhenj duken si ‘varka’ që ‘lundrojnë’ nëpër aeroportin e përmbytur.
Për shkak të motit fluturimet u ndërprenë ose u devijuan. Linja Flydubai anuloi të gjitha fluturimet deri në orën 10 të mëngjesit me orën lokale të së mërkurës, ndërsa kompania Emirates raportoi vonesa fluturimesh.
