3-vjeçari i rrëmbyer nga gjyshërit e tij në Durrës vazhdon ende të jetë i zhdukur.
Ata e kanë marrë nga nëna e tyre në datën 13 prill dhe nuk ia kthyen më. Fëmija po mbahet në mënyrë të padrejtë nga gjyshërit e tij dhe për këtë arsye janë kryer kontrolle në disa banesa të të afërmve të gjyshes së 3-vjeçarit në Kukës dhe në Has, ku mendohej se mbahej i mituri.
Gjyshi 60-vjeçar banues në Durrës R. G dhe vëllai i gjyshes së djalit të mitur banues në Has A. S 49 vjeç janë ndaluar nga policia, ndërsa janë shpallur në kërkim gjyshja e 3-vjeçarit B.Gj 57 vjeç dhe vëllai tjetër i saj 43 vjeç F.S nga Hasi.
“Kërkimet dhe veprimet e thelluara hetimore për rastin, po kryhen nga Policia e Durrësit, në drejtimin e Prokurorisë së Durrësit. Në vijim të punës që po kryhet nga Policia, me qëllim gjetjen e 3-vjeçarit që i është marrë nënës së tij, më datë 13.04.2024, dhe që dyshohet se po mbahet në mënyrë të padrejtë, nga gjyshërit e tij, si dhe me qëllim individualizimin e përgjegjësisë penale për këtë rast, ju informojmë se:
Komisariati i Policisë Durrës, në bashkëpunim me Drejtorinë Vendore të Policisë Kukës, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, kanë kryer kontrolle në disa banesa të të afërmve të gjyshes së 3-vjeçarit, në Kukës dhe në Has, ku kishte indicie se mund të mbahej i mituri. Gjithashtu, është bërë ndalimi i shtetasve R. Gj., 60 vjeç, gjyshi i 3-vjeçarit, banues në Durrës dhe A. S., 49 vjeç, vëllai i gjyshes së 3-vjeçarit, banues në Has. Më tej, janë shpallur në kërkim shtetasit B. Gj., 57 vjeçe, gjyshja e 3-vjeçarit, banuese në Durrës dhe F. S., 43 vjeç, vëllai tjetër i 57-vjeçares, banues në Has.
Policia e Shtetit, në drejtimin e Prokurorisë, po vijon pa ndërprerje kërkimet për gjetjen e 3-vjeçarit, për kapjen e 2 shtetasve të shpallur në kërkim, për individualizimin e përgjegjësisë penale të këtyre 4 shtetasve, si dhe për identifikimin dhe nxjerrjen përpara përgjegjsisë penale të shtetasve të tjerë që mund të jenë implikuar në këtë rast”, njofton policia.
