Herë pas here, informacionet shfaqen në mënyrë ciklike nga burime “të besueshme” të Kremlinit për shkarkimin e këtij apo atij bashkëpunëtor të ngushtë të Presidentit rus Vladimir Putin. Disa burime nga Kremlini pohojnë se në mandatin e ri, shefi i Kremlinit mund të bëjë ndryshime të mëdha. Sipas njerëzve pranë administratës presidenciale dhe qeverisë, Kremlini nuk ka finalizuar ende një listë me emra dhe emërime, megjithatë disa ndryshime të mundshme ka të ngjarë të ndodhin pasi presidenti duket të rifreskojë ekipin e tij në fillimin e gjashtë viteve të tjera në pushtet, thanë njerëzit. Siç shkruajnë mediat e huaja, njerëz të rinjmund të vendosen në poste më të larta qeveritare, duke përfshirë ndoshta si zëvendësministra dhe drejtues të departamenteve ministrore, dhe një brez i vjetër zyrtarësh qeveritarë mund të zbriten në detyrë ose të dalin në pension. Ndoshta po paralajmërohet se mund të ketë një ndryshim në qeveri edhe për shkak të njoftimit të vetë Putinit, se ka ardhur koha për të krijuar një “elitë të re qeverisëse” mbi bazën e një “operacioni ushtarak special”. Megjithatë, këto spekulime vetëm sa kanë nxitur përçarjet midis elitës.
Emrat e rrezikuar
Disa burime theksojnë se mund të “bjerë” edhe kryeministri aktual Mihail Mishustin, madje edhe njeriu që ka 20 vite në krye të diplomacisë ruse, Sergej Lavrov. Disa thonë se vendin e Mishustinit mund ta zërë Sergei Kiriyenko, zëvendës i administratës presidenciale të Putinit, ish-kryeministri më i ri rus, i cili po përgatitej nga oligarkia e atëhershme e Kremlinit për të qenë pasardhësi i Jelcinit. Thuhet se Putini mund ta shpërblejë Kiriyenkon për zgjedhjet e zhvilluara mirë, pasi ai i mundësoi atij të fitonte me mbi 80 për qind, që ishte qëllimi i fushatës. Duhet pranuar që në fillim të vitit kishte pak më shumë spekulime për këtë, por tani është qetësuar disi situata.
Arrestimet e bujshme
Një ngjarje që duket se paralajmëron atë që do të vijë është arrestimi i zëvendësministrit rus të mbrojtjes Timur Ivanov. Ai mori pjesë në një takim të drejtuesve të lartë të ushtrisë këtë javë, i ulur një vend larg shefit të tij dhe i veshur me uniformën e një prej zyrtarëve më të lartë në vend. Disa orë më vonë, Ivanov u dërgua në një sallë gjyqi, ende i veshur me të njëjtën uniformë, por tani i arrestuar nën dyshimin për korrupsion dhe përballet me shumë vite burg. Rënia e një njeri, stili i pasur i jetesës së të cilit njihej dhe tolerohej nga Kremlini për vite me radhë i jep një goditje të rëndësishme mentorit të tij prej kohësh, ministrit të mbrojtjes Sergei Shoigu, në një kohë kur pjesa më e madhe e elitës politike të vendit pret një riorganizim. Në Rusinë e Putinit ka një atmosferë të vazhdueshme pasigurie në rrethin e ngushtë të tij. Jo vetëm Sergei Shoigu, por të gjithë, madje edhe “Financial Times”, pyesin pse u arrestua Ivanovi pikërisht tani, dhe pse u arrestua në Ministrinë e Mbrojtjes.
Loja e Putinit
Spekulohet se ky është një “akt” që dobësoi pozicionin e Shoigut. Ndoshta e gjithë kjo është plani i lojës së Putinit, me të cilin ai dëshiron të disiplinojë bashkëpunëtorët e tij, të cilët i konsideron se janë bërë paksa “arrogantë”. Sipas gazetarit të pavarur rus, i cili u shpall “agjent i huaj”, Aleksei Venediktov, Ivanov madje ishte midis emrave kandidatë për të “zëvendësuar” Yevgeny Prigozhin pas vdekjes së tij në “aferat” me Afrikën. Ndërsa politologu Abbas Galyamov, gjithashtu i shpallur “tradhtar” beson se shanset e Shoigut për rizgjedhje përpara “rindërtimit të qeverisë” tani janë reduktuar ndjeshëm. Siç thuhet edhe nga mediat ruse pro regjimit, do të pritej që një zyrtar i tillë fillimisht të shkarkohej ose të transferohej në një pozitë më pak të rëndësishme dhe më pas të arrestohej, por mesa duket Putin vendosi t’u dërgojë një mesazh bashkëpunëtorëve të tij më të afërt. Por edhe nëse do të ketë disa ndryshime më drastike, është e vështirë të besohet se Putini do të heqë dorë plotësisht nga ndonjë prej bashkëpunëtorëve të tij aktual, ai do të gjejë një “strehë” për secilin prej tyre. Të paktën kështu ka funksionuar deri tani.
VAZHDO TË LEXOSH MË TEPËR PËR TEMËN
“Konferenca e Mynih-ut, paralele fatale mes Hitlerit dhe fundit të Putinit”
