Një tjetër hap i rremë drejt paqes. Hamasi në fakt e ka hedhur poshtë propozimin izraelit për një marrëveshje për lirimin e pengjeve dhe zbatimin e një armëpushimi në Gaza. Sipas transmetuesit izraelit Kan, terroristët palestinezë pretendojnë se propozimi i paraqitur nga Izraeli është “thelbësisht i ndryshëm nga ai i paraqitur nga presidenti amerikan Joe Biden dhe nuk garanton asgjë më shumë se një armëpushim të përkohshëm”. Burimet e Hamasit, të cituara nga gazeta saudite, por me bazë në Londër, Asharq al-Awsat, shpjeguan se organizata palestineze kërkon garanci të qarta për përfundimin e luftës në Gaza pasi të nënshkruhet marrëveshja e pengjeve. “Izraeli po manipulon. Ata duan një armëpushim të përkohshëm dhe pastaj të fillojnë përsëri luftën”, saktësuan burimet, sipas të cilave izraelitët përdorin formula “të paqarta” në tekstin e marrëveshjes të cilat “janë të hapura për interpretim”. Sipas Times of Israel, megjithatë, qëndrimi i burimeve të cituara nga gazeta në pronësi saudite nuk duket të jetë një refuzim formal i marrëveshjes. Dje lideri politik i Hamasit, Ismail Haniyeh, bëri të ditur se organizata e tij do t’i qaset “seriozisht dhe pozitivisht” çdo marrëveshje armëpushimi bazuar në ndërprerjen totale të luftës dhe tërheqjen e plotë të forcave izraelite nga Rripi i Gazës. Kryeministri izraelit Benjamin Netanyahu, nga ana e tij, këmbëngul se nuk do të pranojë asnjë marrëveshje që e pengon Izraelin të përmbushë objektivin e tij për eliminimin e Hamasit. Sakaq, udhëheqësit e vendeve me qytetarë të mbajtur në Gaza i bëjnë thirrje Hamasit që të pajtohet me propozimin izraelit të shpallur nga presidenti amerikan Joe Biden të premten.
VAZHDO TË LEXOSH MË TEPËR PËR TEMËN
10 çështjet më të rëndësishme që ndajnë Biden dhe Trump
