Solstici veror është një ngjarje astronomike që shënon ditën më të gjatë të vitit dhe fillimin e verës në hemisferën veriore.
Pothuajse gjithmonë bie më 21 qershor, por mund të bjerë edhe më 20 qershor ose 22 qershor në varësi të vitit dhe zonës kohore në të cilën ndodheni.
Në atë ditë, gati 90 për qind e popullsisë së botës, që jeton mbi ekuator në hemisferën veriore, do të ketë periudhën më të gjatë të ditës në vit dhe gjithashtu natën më të shkurtër, shkruan AlJazeera.
Pse është 21 qershori dita më e gjatë e vitit?
Solstici veror ndodh kur dielli është në pozicionin e tij më të lartë në qiell. Kjo ndodh një herë në vit, sepse boshti i Tokës anohet me rreth 23.5 gradë në krahasim me planin e saj orbital rreth Diellit.
Kjo pjerrësi është gjithashtu ajo që shkakton ndryshimin e stinëve.
Për disa ditë ose javë para dhe pas 21 qershorit, ata që jetojnë në Arktik, duke përfshirë pjesë të Alaskës, Kanadasë, Grenlandës dhe Skandinavisë, do të kenë dritë të vazhdueshme të ditës duke rezultuar në atë që njihet si dielli i mesnatës.
Dita e parë e verës – në terma astronomikë
Solstici veror shënon gjithashtu ditën e parë të verës në terma astronomikë për ata që jetojnë në hemisferën veriore.
Astronomët përdorin datat e dy solsticeve dhe dy ekuinokseve për të shënuar stinët. Një ekuinoks ndodh kur dielli kalon rrugën e ekuatorit dhe pozicionohet saktësisht midis hemisferave veriore dhe jugore.
Stinët astronomike për Hemisferën Veriore përafrohen më së miri me ditën e parë të muajve të caktuar: Pranvera (1 Mars), Vera (1 qershor), Vjeshta (1 shtator) si dhe Dimri (1 dhjetor).
Dita më e shkurtër në jug të ekuatorit
21 qershori është dita më e shkurtër e vitit në hemisferën jugore, duke prekur rreth 10 për qind të popullsisë së botës.
Për ata që jetojnë në vende si Argjentina, Australia, Afrika e Jugut dhe Zelanda e Re, 21 qershori shënon solsticin dimëror ose ditën e parë të dimrit, shkruan albanian post.
Cila është rëndësia kulturore e solsticit veror?
Solstici veror festohet në shumë mënyra. Përgjatë historisë, kultura të ndryshme janë mbështetur në ngjarje qiellore për të përcaktuar praktikat bujqësore, të tilla si kur të mbillen dhe të korren të korrat, ose në zhvillimin e kalendarëve të ndryshëm në mbarë botën.
Në Suedi, mesi i verës shënon mesin e sezonit të rritjes dhe traditat përfshijnë këndimin, vallëzimin dhe ndezjen e zjarreve.
Mijëra njerëz gjithashtu mblidhen në Stonehenge, një monument antik në Wiltshire të Anglisë, për të dëshmuar lindjen e diellit në linjë me gurët.
