Këshilli i Lartë i Prokurorisë është mbledhur ditën e sotme për të votuar prokurorët e rinj të SPAK.
Gazetarja e Klan News, Glidona Daci raporton se pas verifikimit që SPAK ka bërë për Anita Jellën, ka dorëzuar raportin pranë KLP-së. Anëtarët e KLP kanë vendosur se Jella i plotëson kushtet për të ushtruar detyrën në Prokurorinë e Posaçme.
Ajo ka kaluar me sukses kontrollin për pasurinë dhe atë të verifikimit të pastërtisë së figurës. Në këtë mënyrë, Anita Jella nuk ka pengesë ligjore për t’u ngritur në detyrë. Me 8 vota pro, Jella është votuar prokurorja e re e Prokurorisë së Posaçme Kundër Korrupsionit dhe Krimit të Organizuar.
Në lidhje me kandidatin tjetër, Bledar Maksutin, Komisioni i Posaçëm në SPAK ka kryer verifikimet për pasurinë dhe pastërtinë e figurës duke theksuar se Maksuti i plotëson kushtet e sigurisë për të ushtruar detyrën në SPAK. Këshilli i Lartë i Prokurorisë me 8 vota pro miratoi ngritjen në detyrë për një mandat 9-vjecar të prokurorit Bledar Maksuti në SPAK.
Një nga kandidatët për prokuror i SPAK ka qenë edhe Ndini Tavani. Sipas gazetares Daci, komisioni pranë SPAK ka verifikuar pasurine dhe pastërtinë e figurës dhe ka vendosur se Ndini Tavani nuk i plotëson kushtet e siguriseë për të qenë pjesë e SPAK, pasi nuk ka kaluar me sukses procesin e verifikimit të pasurisë dhe pastërtisë së figurës, megjithatë ky verifikim i veçante nuk e pengon prokurorin për të ushtruar detyrën në Prokurorinë e Tiranës.
Komisioni i Posaçëm në SPAK i kërkoi KLP-së mosemërimin e Ndini Tavanit në Prokurorinë e Posaçme. Pas kësaj kërkese, Këshilli i Lartë i Prokurorise vendosi me 8 vota pro moscaktimin e Ndini Tavanit si prokuror në SPAK. Ky vendim mund të ankimohet në Gjykatën Administrative.
***
KLP pezullon nga detyra e kreut të Prokurorisë së Vlorës, Aurel Zarkën
Me 8 vota pro në KLP, Aurel Zarka është pezulluar nga detyra e drejtuesit të Prokurorisë së Vlorës. Vendimi i KLP-së erdhi pas arrestimit të Zarkës me urdhër të SPAK, i dyshuar për ushtrim ndikim të paligjshëm në disa raste.
Së bashku me Zarkën, u arrestuan dhe ish-oficerja e Policisë Gjyqësore pranë Krimeve të Rënda, avokati Radovan Çela dhe shtetasi Astrit Vladi.
SPAK thotë se nga hetimet rezultoi që herë në bashkëpunim herë jo, kishte ndërhyrë dhe ishte korruptuar bashkë me zyrtarë të drejtësisë për çështje hetimore.
Policia arriti të ekzekutonte vetëm një nga masat e sigurisë të lëshuara, atë për Zarkën, pasi 3 të tjerët rezultuan të ishin jashtë shtetit.
