Përpara se të zërë vendin e tij në Zyrën Ovale përsëri në janar, Donald Trump do të zgjedhë kandidatët për anëtarët e kabinetit dhe zyrtarë të tjerë kyç, të cilët do ta këshillojnë atë drejtpërdrejt për çështje të tilla si mbrojtja, politika e jashtme, kujdesi shëndetësor, ekonomia dhe gjyqësori. Miliarderi Elon Musk u bë mbështetësi dhe donatori më i zëshëm i Trump, dhe mund të marrë një post. Një tjetër aleat i Trump në fushatë që konkurron për një pozicion në kabinet është Robert F. Kennedy Jr.
Ky anti-vaksist i njohur mund të marrë përsipër departamentin e shëndetësisë dhe kjo mund të nënkuptojë ndryshime të mëdha në politikën shëndetësore, duke përfshirë kujdesin shëndetësor të grave. Kurioziteti më i madh është për postin e ministrit të Financave. Dy titanët e fondeve mbrojtëse, Scott Bessent dhe John Paulson, kanë shanset më të mira. Larry Kudlow , i cili ishte këshilltari kryesor ekonomik i Trump për pjesën më të madhe të mandatit të tij të parë, është gjithashtu një kandidat i mundshëm për ministër Financash. Richard Grenell , një ish-kontribues i Fox News, i cili është ndër këshilltarët më të afërt të Trump për politikën e jashtme, po kandidon për Sekretar Shteti dhe ka shanset më të mira për të fituar.
Sekretari i ardhshëm i mbrojtjes mund të jetë Mike Waltz, një kongresmen nga Florida dhe një ish-anëtar i Beretave të Gjelbërta, i cili ka këshilluar Trump për sigurinë kombëtare. Përmendet edhe emri i ish-sekretarit të shtetit, Mike Pompeo, i cili do të mbahet mend për mbështetjen e fortë për Izraelin dhe qëndrimin më të vendosur të SHBA-së ndaj Iranit. Por edhe familjarët e Trump, Donald Trump Jr. , e fejuara e tij Kimberly Guilfoyle ose nusja e Trump, Lara mund të hyjnë në Shtëpinë e Bardhë.
