Teksa pritej një reagim për takimin me ambasadoren gjermane dhe atë të BE-së, kryedemokrati Basha përmes një postimi në Facebook, ka përkujtuar rrëzimin e bustit të ish-diktatorit Enver Hoxha.
Basha shkruan se sot Shqipëria gjendet në një sfidë të ngjashme dhe se qëllimi i tyre është ti japin popullit një qeveri të njerëzve, për njerëzit dhe nga njerëzit.
Postimi i plotë:
Sot përkujtojmë 20 shkurtin 1991, ditën kur shqiptarët u bashkuan dhe shembën jo thjesht një statujë, por simbolin e diktaturës më të egër të Europës, të etur për Liri dhe Demokraci, me ëndrrën më të madhe “Shqipëria si gjithë Europa”!
28 vite më pas, jemi përballë një sfide të ngjashme. Një regjim antidemokratik, oligarkik, i ardhur në pushtet nga blerja e votave përmes krimit të organizuar, po zhbën ëndrrën e shqiptarëve për Shqipërinë si gjithë Europa.
Ndonëse nuk kemi shtatore për të rrëzuar, çdo ditë për ne është 20 shkurt, derisa të shembim sistemin që e mban Shqipërinë peng të krimit dhe korrupsionit duke varfëruar dhe shtypur përditë shqiptarët.
Qëllimi ynë është t’i japim atyre një qeveri të njerëzve, për njerëzit dhe nga njerëzit. Vetëm kështu do ecim të sigurt drejt Europës.
