Mëngjesin e sotëm kryeministri Edi Rama ka dashur ta urojë me pamjet e ndërtimit të Rrugës së Arbrit.
Sipas Ramës po punohet me ritëm të lartë dhe sipas planit.
“Mirëmëngjesi dhe me këtë videoinformacion nga kantieri i Rrugës së Arbrit, ku punimet vijojnë me cilësi e ritëm të lartë, sipas planit. Ju uroj një ditë të mbarë”,shkruan Rama.
Ndërkohë që sot është parashikuar një mbledhje me kabinetin e tij në qytetin e Vlorës.
Edhe më herët është dhënë lajmi se kishin nisur punimet në Rrugën e Arbrit.
“Vazhdon me intensitet të lartë puna në kantierin e ndërtimit të Rrugës së Arbrit. Ditën e djeshme u shënua dhe hapja e tunelit T5 që është 500 meter i gjatë dhe ndodhet në fshatin Fshat të Klosit. Përtej këtij tuneli do të fillojë ndërtimi i Urës së Vashës e cila do të kryejë lidhjen me anën tjetër të rrugës në drejtim të Bulqizës.”-tha ministri Gjiknuri më 16 gusht.
Ndërtimi i Rrugës së Arbrit, është një premtim i kryeministrit Edi Rama, ku u zotua në në fillim të mandatit të tij të dytë qeverisës, do të nisin punimet për këtë aks rrugor.
Zona e Dibrës ia ka kërkuar disa herë ndërtimin e kësaj rruge, kreut të qeverisë dhe mesa duket, ky investim tashmë po merr jetë.
Para pak muajve, qeveria firmosi kontratën për fillimin e punimeve me firmën private “Gjoka Konstruksion” plot 240 milionë euro, ku u tha se punimet do të nisin brenda 2018-ës.
