Flokët thuhet që janë gjysma e bukurisë, sa shumë shqetësohemi kur nuk na rrinë bukur apo kur fillojmë të kemi probleme më to, kur fillojnë të bien më shumë se normalisht, hollohen apo kur humbasin shkëlqimin dhe vitalitetin e tyre.
Ka me dhjetëra e qindra produkte të cilat reklamohen për përkujdesjen ndaj tyre a janë ato vallë vërtete të efektshme? Disa nga patologjitë më të shpeshta të flokëve janë:
Rënia e flokëve në forme difuze (telogen effluvium)
Kur flokët fillojnë të na bien më shumë se normalisht (më shumë se 100 fije në ditë) flokët fillojnë të na rrallohen e të humbasin vitalitetin e tyre, atëherë shkaqet më të shpeshta të kësaj rënie janë:
Deficiencat ushqimore që vijnë si rezultat i një mënyre ushqyerje jo të shëndetshme, mungesa e fibrave, vitaminave, mineraleve, që përgjithësisht gjenden në perimet dhe frutat, mbajtja e dietave të forta për periudha të gjata kohe;
Shkaqe endokrinologjike si hypo ose hyper tiroidizmi, postpartum (mbas lindjes së një fëmije, kjo sepse si rezultat i proceseve të shumta mitotike që ndodhin gjatë shtatzënisë flokët gjatë kësaj periudhe nuk bien, por pas lindjes të gjitha ato flokë që normalisht duhet të kishin rënë gjatë periudhës së shtatzënisë fillojnë e bien njëherësh rreth 3-4 muaj pas lindjes);
Stresi i madh psikik dhe ai fizik;
Anemitë sidomos ato ferriprive (që vijnë si rezultat i marrjes të paktë të hekurit apo humbjes të tij nga organizmi siç janë hemorragjitë e ndryshme);
Infeksionet e përsëritura streptokoksike të fytit, hundës, veshëve etj.
E mira është që, përpara se të shkojmë nëpër qendra estetike dhe të trajtojmë këto rënie, të kontaktojmë më mjekun dermatolog për të gjetur shkakun e kësaj rënie, të cilat siç u përmenden më lartë.
Janë të shumta shkaqet dhe pa i mjekuar ato, ne nuk ndalojmë dot rënien e tyre, pavarësisht trajtimeve të jashtme që mund të bëhen për flokët, si maska apo produkte të tjera kozmetike.
Trajtimi i flokëve bëhet i kombinuar më terapi orale (që lufton shkakun) dhe aplikimin e produkteve kozmetike për flokët.
Kujdes duhet treguar me aplikimin pa kriter të këtyre produkteve, larjet shpeshta, përdorimi i procedurave kozmetike si tharjet e shpeshta me tharëse, aplikimi i produkteve për të shtrirë apo për t’i bërë kaçurrela, ekspozimi për periudha të gjata në diell, e thajnë dhe e hollojnë flokun.
Alopecia areata është një rënie e flokëve e lokalizuar në forme vatrash. Alopecia areata është një tjetër patologji ku floku bie në formën e vatrave të rrumbullakëta apo ovale. Lëkura në këto vatra duket e shëndetshme, por pa flokë.
Kjo formë e rënies së flokëve ka shkak përgjithësisht autoimun, që do të thotë se në mënyrë të pa parashikuar vetë trupi ynë krijon antitrupa që shkatërrojnë rrënjën e flokut (folikulin e tij).
Në 30 % të rasteve shoqërohet më patologji të tjera autoimune siç janë thiroiditet autoimune (sëmundje e gjëndrës tiroide, vitiligo (zbardhja e lëkurës më vatra), anemia pernicioze.
Trajtimi i kësaj patologjie konsiston në injektimin e solucioneve kortizonike në vatrën alopecike më një interval prej 4 javësh, dhe vitaminoterapi.
Alopecia androgjenike
Shpesh themi edhe pse s’ka flokë është njeri fisnik, rënia e flokëve në pjesën ballore të kokës quhet alopecia androgjenike, e cila ndodh si rezultat i kombinimit të faktorëve gjenetike me faktorë hormonal (andogjenet).
Këto janë hormone mashkullore dhe veprojnë duke rritur apo shtuar qimet në pjesë të ndryshme të trupit, por fatkeqësisht bëjnë që të bien flokët në pjesën ballore të kokës (përgjithësisht te personat që kanë të trashëguar këtë gjë).
Alopecia androgjenike ndodh si te meshkujt edhe te femrat
Te femrat kërkohen ekzaminimet hormonale si testosteroni apo dehydroepiandrosteroni, sepse kjo patologji mund të shoqërohet edhe më shqetësime të tjera si cikël menstrual i çrregullt, infertilitet, akne, virilizëm.
Trajtimi: aplikohet solucion minoxidil, lokalisht 2% dhe 5% në zonën e kokës ku ka rënie flokësh, ndërsa të meshkujt përdoret edhe finasterid 1 mg çdo ditë, mjekime këto që duhen dhënë dhe ndjekur nga mjeku dermatolog.
Dr. Shk. M Blerta Gjoni
Trichotillomania
Trichotillomania është një patologji që ka të bëjë më një ndjenjë kompulsive për të shkulur flokët dhe ka lidhje më çrregullime kompulsive psikike, këta personat duke realizuar vetë shkuljen flokëve qetësohen nga kjo lloj ndjenje dhe në njëfarë mënyrë shkarkojnë stresin që përjetojnë.
Flokët në zonat ku shkulen janë të rrallë, por duken mjaft folikuj flokësh, gjë e cila të ndihmon të diagnostikosh sakte këtë patologji, zakonisht kjo patologji vihet re tek adoleshentët apo edhe të fëmijët.
Rënia e flokëve në këtë rast nuk ka shkaqe organike, por mbrapa saj fshihet një çrregullim psikik, që mund të vijë si rezultat edhe përjetimit keq të situatave të vështira, mjekimi në këtë rast bëhet në bashkëpunim më mjekun psikiatër.
VAZHDO TË LEXOSH MË TEPËR PËR TEMËN
3 receta për flokë të shëndetshëm
