Edison Haziraj mendohet të jetë vrarë për hakmarrje.
Pista kryesore mbi të cilën po heton policia për vrasjen e dyfishtë të së martës në Durrës ku mbeti viktimë Edison Harizaj dhe Genci Caci, mbetet kjo.
Hakmarrja ka ndodhur për një seri ngjarjesh kriminale që fillesën e tyre e kanë para viteve 2000 në Vlorë.
Për shkak të tyre Harizaj dhe një miku i tij po ashtu i përfshirë në këto ngjarje kriminale kanë qenë në shënjestër të vrasësve gjatë këtij viti.
Sipas hetimeve të deritanishme i zhdukuri në Vlorë Andi Xhaferri ishte caktuar që të mbante nën vëzhgim Hazirajn dhe mikun e tij i cili më herët i kishte shpëtuar një atentati për të kuptuar rutinën e tyre.
Xhaferri ishte porositur t’i gjente banesat, makinat, vendet që frekuentonin më tepër në mënyrë që të ndërtohej një pritë për t’iu bërë atentat.
Për këtë detyrë që ai e kishte marrë nga Belgjika, Xhaferri kishte vënë në dijeni edhe shokun e tij Elton Troqe. Por vetëm pak ditë pasi Xhaferri erdhi në Vlorë për të kryer porosinë e marrë dhe nisi të gjurmojë personat së bashku me mikun e tij u zbulua prej Hazirajt dhe mikut të tij. Dy të rinjtë humbën kontaktet me familjarët dhe dyshohet të jenë vrarë.
Fill pas kësaj ngjarje Haziraj u zhvendos nga Vlora në Durrës ku jetonte në një banesë me qira pranë zonës së Plazhit në Durrës jo shumë larg vendit ku u vra.
Nisur nga ky episod policia dyshon se vrasja e Haxirajt, i cili ishte shënjestër i atentatit dhe i Genci Cacit është porositur nga Belgjika.
Është ende e paqartë nëse ekzekutimi është porositur me pagesë apo autori ka hyrë ilegalisht në Shqipëri dhe ka kryer vetë ekzekutimin.
Autori i dyshuar është një person me precedentë penalë i dënuar për vrasje që ka mundur të arratiset nga burgu dhe prej kohësh strehohet në Belgjikë.
Ai cilësohet si njeri i rrezikshëm dhe pjesë e një bande kriminale në Vlorë.
VAZHDO TË LEXOSH MË TEPËR PËR TEMËN
Krimet e Hazirajt, viktimës në atentatin e Durrësit
Breshëri kallashnikovi mikut të Shullazit, 10 të shoqëruar
