Ditën e sotme banorët e Unazës së Re mbajtën një protestë para ambienteve të Kuvendit lidhur me projektin e ri i cili iu prek banesat.
Protesta mori karakter të dhunshëm, bazuar në aktet që si pasojë sollën lëndime fizike të rënda tek forcat policore si dhe tek vetë qytetarët e protestuesit.
Banorë të Unazës së Re tentuan të hynin me forcë në Parlament, dhe pas kësaj, Prokuroria e Tiranës ka reaguar përmes një deklarate.
Organi i akuzës bënë me dije se janë kryer veprimet e para proceduriale.
Po ashtu prokuroria pohon se 15 punonjës policie jane plagosur, si dhe 3 protestues.
NJOFTIMI:
“Prokuroria e Rrethit Gjyqësor Tiranë me juridiksion të Përgjithshëm, me datën 22.11.2018 ka regjistruar kryesisht procedimin penal nr.9146, për veprat penale të:
1.Plagosja e rëndë me dashje, e parashikuar dhe e dënueshme nga nenei 88/1 i K.Penal.
2.“Mbajtja pa leje dhe prodhimi i armëve shpërthyese dhe i municionit”, e parashikuar dhe e dënueshme nga neni 278/1 i K.Penal (i ndryshuar).
3.“Kundërshtimi i punonjësit të policisë së rendit publik”, e kryer me dhunë dhe në bashkëpunim, e parashikuar dhe e dënueshme nga neni 236/2 i K.Penal.
4.“Organizimi dhe pjesëmarrja në grumbullime dhe manifestime të paligjshme”, e parashikuar dhe edënueshme nga neni 262 i K.Penal.
5.“Prishja e qetësisë publike” e kryer në bashkëpunim, eparashikuar dhe e dënueshme nga nenet 274-25 të K.Penal.
Pas regjistrimit të procedimit penal është krijuar grupi hetimor në përbërje të të cilit janë prokurorë dhe oficerë të policisë gjyqësore.
Në drejtimin e prokurorëve janë kryer veprimet e para proceduriale, që kanë të bëjnë me kqyrjen e vendit të ngjarjes, fiksimin e provave materiale, pyetjen e të dëmtuarve, në Spitalin e Traumës në Tiranë, identifkimin nëpërmjet pamjeve filmike, si dhe në bashkëpunim me punonjësit e policisë, të personave që kanë kryer veprime konkrete, me qëllim kapjen dhe vënien përpara përgjegjësisë së tyre.
Nga veprimet e kryera deri tani rezulton se janë dëmtuar 15 punonës policie, mes tyre dhe shtetësja I. M, me dëmtime të rënda të shëndetit, punonjëse policie e repartit special “Shqiponja”.
Po ashtu në Spitalin e traumës janë paraqitur për ndihmë mjekësore dhe tre qytetarë, pjesmarrës në protestë.
Veprimet në lidhje me këtë çështje penale vazhdojnë deri në dokumentimin e plotë të veprave të kryera, si dhe arrestimin e personave përgjegjës dhe dërgimin e tyre para Drejtësisë.
Prokuroria e Rrethit Gjyqësor, Tiranë, siguron publikun, se në zbatim të detyrës tonë kushtetuese ka patur dhe do të ketë përkushtim maksimal për zbardhjen e shpejtë të ngjarjes, si dhe kërkon bashkëpunimin e tyre në përmbushje të rregullt të kësaj detyre.”
VAZHDO TË LEXOSH MË TEPËR PËR TEMËN
“Rrezik serioz për banorët”, Sandër Lleshi urdhër tjetër Policisë
